CYMA in bazar-ah halpuah/ halmawi dap
Vawiin, December 30 chawhnu khan Central YMA chuan Aizawl Bazar leh a chhehvelah halpuah leh halmawi zuar an awm leh awm loh enfiahin an hnatlang.
Central YMA office bearer te kaihhruaia group 5 a inthenin Chanmari atanga Sipai Lammual hmar lam gate inkar, bazar leh a chhehvel fangkualin halpuah leh halmawi zuar an awm leh awm loh an enfiah a. Dawrkaite chu sawrkar phal loh thil halmawi chi hrang hrang zuar lo turin an ngen kual nghal bawk.
Aizawl bazar leh a chhehvel an fankualnaah hian Central YMA OB te leh CEC member te bakah YMA branch hrang hrang – Dawrpui, Zarkawt, Chanmari, Electric Veng, Chhinga Veng leh Saron Veng branch hruaitute an tel a. Aizawl Police Station atangin police lamin duty insiamin an puibawm a.
Hetianga enfiah hnatlang hi Krismas hma, December 21 (Inrinni) khan an lo nei tawh a ni.
Central YMA hian vawiin khan Aizawl khawpui chhung hmun hrang hrangah lirthei atangin halpuah leh halmawi that loh zia mike in an puang bawk.
Central YMA chuan kumthar lo thleng tur hlim taka kan hman theihnan mipui duhsakna a hlan a, sawrkar phal loh thil halpuah leh halmawi hal lo tur leh zuar lo turin mitin a ngen tih a sawi.
YMA branch hrang hrang pawh mahni huamchhung theuhah theihtawpa tan la turin a ngen nawn tih a sawi bawk.