CYMA-in hmun thenkhata roll enthat duh Hearing neihnaa tel tha turin a ngen lawk

Special Intensive Revision neih meka draft electoral roll enin, hmun thenkhata voter awm dan chu thil nih dan phung pangngai ni thei lo a ni tih Central YMA chuan sawiin, heng hmun hi enthat an duh tih an sawi a. Sawi leh sel theih hun tawpnaa hearing neih hunah YMA branch leh an thawhpui NGO dang bakah political party pawh roll dik tak neih theihnan tang tlang turin an ngen lawk tih an sawi.
Central YMA president R Lalngheta chuan, SIR 2026 enumeration form thunluh zawh hnua draft electoral roll tihchhuah a nih hnu ah state pum niloin, hmun thenkhatah thil fel lo awm niin an hria a, ngaihthat thlak loh an ti tih a sawi. Tuna thil awm dan an chhuizuinaah pawh electoral registration officer (ERO) pakhat chu chawhma dar 11.00 vela an biakin biak tlak a lo awm vak tawh loa, an hriat zel danin nidangah pawh office lam thlengin zu avangin hna thawk hleithei loin a lo awm fo atih a sawi. “Electoral roll ennawn, thil sensitive lutuk pawh khawih hleithei loa awm an awm hi a pawi kan ti,” a ti.
Central YMA general secretary Prof Malsawmliana chuan, SIR 2026 ah hian kum 2005 electoral roll-a anmahni emaw an thlahtute emaw awmte tan chuan harsatna awm loin, dik leh felfai taka inthlunzawm theih a nih lain, 2005 SIR neiha electoral roll-a anmahni emaw an thlahtute emaw awm lo tan erawh, SIR 2026 draft electoral roll-a an awm a nih pawhin, endik nawn lehna (hearing) neih huna an lut a nih loh chuan luh mai theih a ni lo tih a sawi.
SIR 2026 chu India khua leh tui dik tak chauh electoral roll-a awm theihna tura thil pawimawh tak a nih rualin, tih dik loh palh a nih chuan khua leh tui dik tak ni lo tan awlsam taka electoral roll-a luh theihna a ni thung tih a sawi a. SIR 2026 draft roll kha ngun takin an zirchiang a, Assembly constituency thenkhatah 2005 SIR-a voter awm zat leh mihring pun dan nena chhutin, enumeration form thunluh (digitisation) ah thil ni thei lo awm niin an hria a, mapping chungchang chu entha leh turin thuneitute ngen an tum tih a sawi.
ERO leh assistant ERO te pawh ram leh hnam himna tur a ni tih hria a, dik leh fel taka thawk turin an beisei tih CYMA general secretary hian sawiin, “Roll-a la awm ngailote tana inthunluh dil hun hawn mekah leh hearing neih hunah pawh khua leh tui diktak chauh an luh theihnan hearing kalpui turin ERO leh AERO te kan ngen a. Hearing-ah hian YMA branch leh kan thawhpui NGO-te pawh thahnemngai taka tel turin kan ngen. Political party-te pawh an party mi an nih vang mai emawa ngaihtuah dang hmang lo turin kan ngen a ni,” a ti.
Central YMA finance secretary MS Ralte chuan rinhlelh an neih dan a sawifiah a. India ramah Special Intensive Revision hi kum 2005 khan neih a ni tawh a, kum 2026-ah neih leh niin, a karah kum 20 vel a tla. He kum 20 chhung vela polling booth khata voter pun dan (2005 SIR leh 2026 SIR draft roll) khaikhinin, voter punna hi zaa za chuang, zaa 120 te pawh a awm tih a sawi. Chu mai a ni loa, mapping (2005 electoral roll-a anmahni emaw an thlahtute emaw awmte nena 2026 SIR neiha thlunzawm theih dan) ah heng khua hoah hian thlunzawm theih nei vek an ni chu ti rinhlelhawm zualtu a ni tih a sawi.
Entirna pakhat lachuakin, West Tuipui biala Devasora Polling Booth-ah kum 2005 hian voter 190 an awm a, tuna SIR neihah hian heng zinga 107 chu la dam zelin, self mapping ti thei an la ni a; tuna SIR neihah voter 444 an awm dawn a, an vai hian 2005-a vote nei tawhte nena thlunzawm theih (an tu leh fate, an thlahte) vek anga chhal an ni tih a sawi. Mizoram hmun dang an zirchiannaah pawh hetianga rinhlelh kai ang hi a awm lo tih a sawi a ni. Devasora booth ang hi hmun dang pawh a awm nual tih a sawi a ni.
Zawhna chhangin Central YMA hruaitute chuan, SIR 2026 kalpui tan tirhah Election Commission of India hmalakna chu ringtawkin a hranpa in an enpui loa, dan dik leh fel taka tih theih an duh vang erawh chuan thuchhuah an siam tih an sawi. Myanmar raltlan electoral roll-a an chuan theihnan CYMA ang chuan hmalakna a awm loa, chutianga luh tum an awm a nih pawhin, danin a phut document phochhuah ngai a tam a, chumia tling lo na na na chu an luh theih an ring lo tih an sawi a ni.
Central YMA president chuan tuna hma an lak meknaah hian NGO an inthurual a, an thawhpui Central Young Lai Association, Mara Thalai Pawl leh Central Young Chakma Association nen pawh inlungrual takin an kal tih a sawi.