Huna Kawlvawm
JANUARY 12, 2024 :
9th Mizoram Legislative Assembly budget session thut hun tur ruat la awm lo mah se, Budget thar 2024-25 D-A-H BUDGET hi kum dang budget zawng aiin Mizoram mipuiin an ngaihven a, an beiseina a sang hle dawn tih hi a chiang khawp mai. Amaherawh chu, Mizoram hi sum dinhmun chhia leh harsa takah Covid-19 nghawng avang leh chhan hrang hrang vanga alo awm tawh avangin kum khat budget atang ringawta sum harsatna awm hi chin fel duak chi ziazang a ni lo thung ang tih chu kan hriat a tul ang.
Pu Lalduhoma, Chief Minister, Finance portfolio changtu ni bawk hi Mizo politician zinga Budget nih phung leh awmzia sawi fiah tha ber a ni hial awm e. A chhan chu Minister leh MLA tu pawhin thil tih tur leh thu tiam thin mahse, chu a thu tiam tih hlawhtlinna tur sum chu Budget-ah DAH a nih si loh chuan, darbenthek ri ang mai, ri satliah mai mai anih dawn vang leh an thu tiam leh sawite chu thu tiam ruak a nih dawn vang a ni.
Financial year thar Mizoram 2024-25 Budget tur thlir lawk tur chuan kum kal mek 2023-24 Budget zat, a nih phung leh he budget-in a kawh nat bik lam te pawh bih chianna tel lo chuan a fiah tawk dawn loh avangin budget kal lai mek hi kan sawi hmasak emaw kan sawi kawp emaw a tul tih hre tel ila.
Budget zat
Kum kal mek 2023-24 budget pumpui hi Rs 14,209.94 crore a ni. Kum hmasa 2022-23 BE supplementary demand nen belh khawm aiin 1.44% in a pung.
D-A-H budget beisei zat
DAH BUDGET 2024-25 tur hi tun Budget kal lai mek 2023-24 Original Estimate Rs 14,209.94 crore ai hian hian 20% vel talin pung thei se a tha ngawt ang.
A chhan chu inthlan laia mipuite hnena a zawrh tam tak KAL PHUNG THAR-in a ken tel chu he Budget-ah hian a fun tel thlap a ngaih nghal vang a ni.
Harsatna awm thei chu Central Govt atanga devolution of revenue deficit grant 15th Finance Commission in Mizoram a rawn pek tur chu hriat tawh sa a ni a, kumin Budget ami aiin a tla hniam duai a.
Supplementary demand for grants tam ang
Tun Budget 2023-24 kal mek pharh a nih rual khan kum hmasa sum indaih loh dil belhna ( supplementary demand for grants) t 3265.69 crore a pharh tel a ni a, kum 2023-24 sum indaih lohna dil belh ngai hian Rs. 4,000 crore a tlin pawhin a mak lo ang.
SEDP ATAN Rs 595 CRORE DAH
2023-24 Budget-ah hian sum hmanna tur lamah Rs 595 crore SEDP atan dah a ni a, 2022-23 a dah Rs 700 crore aiin Rs. 105 crore in a tlem zawk a ni.
Thlai thar leina, hand holding atan
Campaign laia mipuite hnena zawrh leh tlangaupui tam tak Thlai thar leina, Hand holding policy etc tur hian Rs 1,000 crore vel tal thil danga pen rem lo tura 2024-25 budget ah hian DAH thei se, mipui beiseina tam tak chu a phuhru ngei ang.
Hei a bul ka tan êk êk chauh a, ka mit a kham tlat mai, duh tawk rih phawt ang.