Damdawi in bawlhhlawh (bio-medical waste) him zawka sawngbawlna tur – Common Bio-medical Waste Treatment Facility Tuirial chu hman tan a ni dawn ta a. Damdawi in bik bawlhhlawh phurkhawma a sawngbawlna hmuna dahtu tur lirthei – Bio-medical Waste Collection Van panga pawh Zirtawpni khan UD&PA minister K Sapdanga’n a vailiam a.
Hei hi Mizoram tan ‘hriselna lam hmalakna kawnga hmasawnna rahbi pawimawh leh chhinchhiahtlak’ tiin a sawi theih awm e.
Tunhma deuh khan damdawi in bawlhhlawh bik thehthang dan tur leh sawngbawl dan turah hma lak tum a ni thin a. Private hospital din a han nih hian, hospital ruangam tur hrim hrima sak ni lo building an luah mai thin a. Damdawi in te hi, dan ang chuan, damdawi bawlhhlawh bik halralna tur ‘incinerator’ nei tura tih an ni a, mahse hospital awmna chin (hospital premises) chhungah chutianga incinerator han dinna tur hmun awl awm pawh ni se, vantlang chenna hmunin a hual khah vek thin avangin pollution control board lamin an remtih loh bakah khawtlang hriselna khawih pawi thei a nih avangin thil tih chi a ni lo hrim hrim a. Chuvangin, private hospital-te chu danin a phut angin damdawi in bawlhhlawh sawngbawlna/thehthangna hmun bik nei tura tih an ni a. Chutianga private hospital hrang hrangin anmahni damdawi in bik bawlhhlawh sawngbawlna, hmun hrang hranga an nei thliah thluah chu a nihna tur anga sawngbawl leh enkawl a ni reng em tih chu enfiah leh endik reng theih a lo ni lova, chu chu mipui tan a him lo deuh deuh zawk a ni.
Thawkkhat lai khan, hetiang damdawi in bawlhhlawh bik hi a khawnkhawmtu bik siam a, bawlhhlawh paih man pawh private hospital ten chawi thin se tih a ni a; private hospital lam an inhuam viau laiin sawrkar lamin a puitlin thei ta chiah lo kha a ni a.
Tuna hetia Common Bio-medical Waste Treatment Facility neih a han ni ta hi thil lawmawm tak a ni a, private hospital-te tan pawh a thawventhlak deuh huaiin a rinawm a, bawlhhlawh paih man lo chawi mai kha anni tan chuan a hnakhat a, hun leh tha, sum leh pai tam tak an hum theih phah bawk ang.
Hetih rual hian, hospital tinte hian a nih dan tur angin bio-medical waste te hi “Biomedical Waste Management Rules” angin an sawngbawl em tih hi thuneiten a hmunah an enfiah fo a la pawimawh tho awm e.
Damdawi in bawlhhlawh bik hi…
