Hrangturzo bialtu MLA Lalmuanpuia Punte chuan a bial chhunga damdawi in pathum tan x-tay khawl a hlan.
Adviser to chief minister ni bawk Lalmuanpuia Punte hian Inrinni khan a office-ah a bial, Hrangturzoa health care centre pathum- Biate CHC, East Lungdar PHC leh N Vanlaiphai PHC a hman turin x-ray khawl hi a hlan a. Heng damdawi in pathuma x-ray khawl hi a hmantlak tawh meuh lo a, a khawl a hluiin a fiah lo a, a chhawrtu mipuiin harsatna an lo tawk tawh thin nia sawi niin, MLA hian MLA-LADS fund hmangin a lei sak a, a enkawl tur technician awm tur an ni tih a sawi.
MLA fund-a a ngaihpawimawh ber chu vantlangin a huhoa an chhawr tlan theih thil tih nana hman a ni, tiin Lalmuanpuia Punte chuan, Biate CHC-a x-ray khawl chu Health director Dr Arora hunlai ami tawh, N. Vanlaiphaia PHC ami chu kum 2016-a chhia a ni tih a sawi a. MLA fund hmangin a lei theih angem, tih a ngaihtuah thin a, lei theih a ni tih a hriatin MLA fund hlui, la hman zawh loh hmangin an lei a; a leina leh a install-na zawng zawng nen pakhat hi cheng nuai 6 velin a zo thei tih a sawi.
Tangkai taka bial chhung mipuiin an hman a beisei tih sawiin, “Zirna leh hriselna ka ngaipawimawh hle a, vantlang hriselna a that loh chuan vantlang nun a hlim thei lo. Zirna a that loh chuan ramin hma a sawn thei lo, chu chu ngaihpawimawh lehzual ka tum a ni,” a ti.
Damdawi in tan x-ray khawl hlan
