Damdawi in tha zingah PHC pathum
India rama sawrkar damdawi in tha bik tehnaah Mizorama primary health centre pathum – Kanghmun PHC, Darlawn PHC leh Buarpui PHC an tel thar.
National Health Mission Mizoram mission director Dr Lily Chhakchhuak chuan India rama sawrkar damdawi in tha bik tehna, National Quality Assurance Standards (NQAS) ah Kanghmun PHC, Darlawn PHC, leh Buarpui PHC an tling thar tih a sawi a, tehfung chi hrang hrang hmanga teh a nih hnuin 95.19%, 85.84% leh 93.69% an hmu tih a sawi.
Heti hian Mizorama PHC zingah NQAS certificate hmu PHC 22 an awm ta a ni.
Mizorama sawrkar damdawi in 32 chu NQAS national certificate nei tawh an ni a. Tunah hian sawrkar damdawi in 23-in state level certificate nei tawhin national certificate result nghak mek 8 an awm a ni.
Health & Family Welfare minister Lalrinpuii chuan, India rama damdawi in tha bik thlan chhuah zingah Mizorama damdawi in an awm belh zel chu mellung pawimawh tak a ni, tiin, damdawi in, district leh state-a thawktute thawhrimna leh taimakna chhuanawm a tih thu a sawi.
Damdawi in tha zingah PHC pathum
