Damdawi pathum zawrh phal lo
Mihring tana hlauhawm chemical a tel avangin damdawi pathum chu Mizorama lakluh, zawrh leh chawh khap a ni.
Health & Family Welfare department hnuaia Food & Drugs Administration hotute chuan damdawi pathum – COLDRIF syrup
(Paracetamol, Phenylephrine Hydrochloride, Chlorpheniramine Maleate); Respifresh TR (Bromhexine Hydrochloride, Terbutaline Sulphate, Guaiphenesin & Menthol Syrup) leh RELIFE (Ambroxol Hydrochloride, Guaiphenesin, Terbutaline Sulphate, & Menthol Syrup) chu mihring tana chemical hlauhawm tak Diethyline Glycol (DEG) pai (contaminate) an ni tih FDA Madhya Pradesh state report atangin hriat a ni tih a sawi.
Coldrif syrup phei chu naupang engemawzatin an thihpui a ni tih finfiah a ni tawh, tiin, hei vang hian Mizoramah heng damdawi ho hi zawrh tura lakluh leh hralh khap a ni tih a sawi a. Damdawi zuar zingah heng damdawi kawl an awm chuan thuneitute hnenah rang taka hriattir turin a ti a; doctor-te pawh heng damdawi hi chawh lo turin a ngen a ni.
The Aizawl Post thudawn danin diethyline glycol hi industry-ah chuan thil vawnthatna atana hman thin a ni a, ram dangah pawh hetiang ei avanga mi engemawzat thihna hi a lo thleng tawh thin. COLDRIF syrup hi naupang hritlang damdawi a ni a, a siamtu company hi Sresan Pharmaceuticals, Bangalore a ni a, dan ang thlapa damdawi siam thin an ni na in, hetiang thil hi a lo thleng ta a ni. Tun tumah hian Madhya Pradesh leh Rajasthan-ah naupang 16-in an thih phah tawh.
Damdawi pathum zawrh phal lo
