November 11-a Dampa bialtu MLA tur thlanga vote an thlak chu Zirtawpni khan chhiar a ni a, MNF candidate Dr R Lalthangliana chu vote 562-in amah hnaih bertu lakah chakin, he bialtu MLA atan thlan a ni.
Tarlan tawh thin angin Dampa bial by election ah hian candidate 5 an awm a. Chu’ng zingah chuan sawrkar lai party ZPM candidate Vanlalsailova leh he biala MLA nei lai, MNF candidate Dr R Lalthangliana te chu inkhing ber an ni. Vote tla hi zing dar 8.00 a chhiar tan a ni a, round 1 atanga 5 thleng awmin, chawhma dar 10.00 rik hma in a chak zawk tur hi a chianga ngaih a ni tawh. Vote hi chawhma dar 11.00 hmaa chhiar zawh a ni.
Chakna chak zawk ta Dr R Lalthangliana hian vote 6981 a hmu a, Vanlalsailova hian 6419 a hmu a ni. Vote chhiar zawh a nih hian returning officer Malsawmzuala chuan Dr R Lalthangliana hnenah Member of Legislative Assembly nihna certificate a hlan nghal a ni.
“Pathian malsawmna leh Dampa bial mipui min duhsakna avanga thlantlin ka ni hi thinlung chhungril atangin lawmthu ka sawi a ni,” MLA thar Dr Lalthangliana hian a ti a. Inthlan bul tan atanga a tul apianga buaipuitu an party hruaitute leh party mi bakah a thawhpuite chungah lawmthu a sawi tih a sawi. Dampa bial mipui thlawpna avang leh, felfai leh boruak muanawm taka inthlan buatsaihtute chungah lawmthu a sawi tih a sawi bawk.
“Dampa bial enkawl tura ka koa mawhphurhna awm hi Pathian rinchhan chungin theihtawp chhuaha hlen chhuah ngei ka tum dawn a ni,” a ti a. Thahnem ngaih luat avanga mi thinlung hliam palh a neih chuan ngaihdam a dil tih a sawi a ni.
Sl.No. Candidate Party Vote hmuh
1. John Rotluangliana INC 2394
2. Lalhmingthanga BJP 1541
3. Dr R Lalthangliana MNF 6981
4. Vanlalsailova ZPM 6419
5. K Zahmingthanga MPC 50
6. Nota 45
Dampa bial inthlanah MNF tling Mawhphurhna hlen ka tum dawn: – Dr R Lalthangliana
