Dampa bial by election-ah vote tla zaa 82 chuang a ni a. Zan dar 8.00 vel khan Marpara North-ah chuan vote an thlak zo chauh nia sawi a ni. Dampa bialah hian polling station 41 a awm a. Thudawn danin, polling station tinah hian tluang taka vote thlak a ni. Polling station 40-ah hian webcasting hmangin District Election Office atanga vil reng an ni a, Zopui Polling Station erawh kawlphetha in a thlunzawm loh avangin kalpui theih a ni lo.
Thudawn danin, polling station 39-ah chuan vote thlak theih hun tura ruahman lawk, tlai dar 4.00 ah mipuiin vote an thlak zo hman a. Silsury-I leh Marpara North Polling Station ah chuan an thlak zo hman lo. Dar 4.00 rik hmaa vote thlak hman lo, polling area awm hman chin vote thlaktir an ni a, Silsury-I PS-ah hian zan dar 7.00 velah an thlak zoa, Marpara North PS-ah hian zan dar 8.00 velah an thlak zo nia hriat a ni.
Heti hian vote tla hi chawhma dar 11.00 thlengin zaa 34.38, chawhnu dar 1.00 thlengin zaa 56.35, chawhnu dar 3.00 thlengin zaa 75.15, tlai dar 5.00 thlengin 75.92 a ni a; hemi hnu lam hi manual-a chhinchhiah a ngai tawh. He chanchin buatsaih lai hian zaa 82.34 a tla tih a chiang tawh a, zaa 83 kai thei a ni tih sawi a ni.
Tarlan tawh thin angin Dampa biala by election neih chhan hi a bialtu MLA Lalrintluanga Sailo a thih vang a ni a. A ni hi MNF ticket-a thlantlin niin, kum 2023 inthlanpuiah khan he bialah hian vote zaa 86.23 a tla a ni. Tun tum by election ah hian voter 20790 an awm a, venhim ngai bik – Critical Polling Station pathum Silsury I, II, III an awm.
Vote tla hi November 14-ah chhiar a ni ang.
Dampa biala vote tla 82% chuang Marpara North-ah vote thlak rei
