L Sailo
Mizote hian khawvel kan pal zau ve ta viau a. Ram ropui US, UK, Singapore .. leh ram ropui dangte tlawh tawh ho hian hahipa an rawn sawi haw ziah thin chu, an va kalna ram amite’n an ram dan an zawm that thin zia hi a ni. Lena sangha 5 aia tam man phal lohna dilah, 5 aia tam pawh an lenin a lo khuh palh pawhin, 5 aia tam chin chu dilah an vawrh lut leh mai a. Mi’n hmutu pawh an awm lo, 5 aia tam pawh hawn mai ang, tih paw’n, ‘Mi’n hmutu an awm loh vang tak khan 5 aia tam kan man tur a ni hlei nem’ an ti mai a. Australia-a a naute tlawha zin, kan u pakhat pawhin, an vah kual velna-ah state pakhat atanga state dang an luh dawnin, thei natna theh darh palh venthawn thuah, ramri-ah ‘state dang thei reng reng ken luh phal a ni lo’ tih a lo intar a. A naute chuan an serthum ei bang ahte chu an paih sap sap a. Mahse ani chu, India atanga zu zin tih takah, a serthlum ei bang a bag ami chu paih duh loin a zep ta a. An kalna tur an va thlen chuan kan u chuan, intithei takin ‘Hei, kei chu serthlum ka la nei bik’ tiin a naute chu a han awhfik fiam vel a. A naute chuan an han hmuh chuan ‘Aaa! Ka u chu i ti ang lo em mai! Saw tah khan engatinge i paih ve mai loh? I duhte chuan hetah pawh lei tur a tam alawm’ tiin an khak ta a. ‘A zahthlak duh khawp mai’ a ti. London-a awm Mizo thenkhat chuan zan lai pelh hnu, mi tu mah vei vak an awm tawh lohah pawh, tu mahin traffic signal an bawhchhiat ngai loh thu an sawi bawk!
Engatinge ram ropui leh changkanga mi chengte hian dan an zawm that theih bik thin?
Ram ropui leh changkanga mi chengte hian dan an zawm tha thei bik thin, a ni lo a, dan zawm that a nihna ram chu, ram ropui leh ram changkang an ni zel thin, ti ila a dik zawk. Ram dang mipuite’n dan an zawm that bik nachhan chu, keini aia mimala an fel bik em vang lam ni loin, an ram hruaitute’n an ram chu a tir atanga ram dan zawm zawnga an hruai tlat avangin an mipuite’n an mimal nun leh an khawtlang nunah ram dan zawm chu ngaia neihin an thanhnan tawh vang a ni a. Chuvangin an ramah dan zawm kha thil harsa leh buangbar thlak a ni ve lo a. Ram dan zawm loh chu, an khawtlangah ram nunphung pangngai zawm lo, mi mak tih leh thinhrik hlawhna a ni zawk. Chutianga ram dan zawm kalphunga neih ramah chuan, induhsakna leh inthleina tel lova a fel fel, a thiam thiam, a taima ma dinchanna leh, chulama inelna / intlansiakna tha a rawn piang ta vat thin a. Chuvangin, an ram pawh, kum 30 /40 vel lek chhungin ram hausa leh changkang, a mi chengte pawh hnam ropuiah an insiam thuai thei thin a lo ni.
Tichuan, keini pawh kum tam ngai lova ram hmasawn leh hnam chak kan nih theihna tur chuan, RAM DAN ZAWM hi mimal leh khawtlangin nunphunga kan neih tham khawpin kan ram hruaitute’n, ram dan hi ram kaihhruai nan ber an hman a tul a. Chu chu a kawng awm chhun a ni. Chutiang a nih loh chuan, ram hmasawn leh chak ni ve turin ram mipui mimir tam ber hian, finchhuah lohin mahni tawka dan zawm thatna hre thama kan intauh harh hun kan nghah a tul a. Chu chuan kum za tam a duh thin. Chumi chhunga chim ral kan nih em loh pawhin, ram dang chu an than ngaiin an lo thang reng dawn si a, ram dang umphak ngaihna erawh a awm chatuan dawn lo tihna a ni.
Engatinge kan ram hruaitute hian ram dan hi ram kaihhruai nan ber an hman ve loh?
A chhan ber chu, kan politician ram hruai tura kan thlante hian, Democracy kalphung kan hman ve tirh 1952 atang tawhin, ram dan hmanga ram kaih-hruai hi, India danpuiin kan ram kalphung tura a duan a nih hi an la man (duh?) loh vang a ni ber a. Democracy chu ‘mipui rorelna ram’ ti siin, thlan tlin an lo nihin anmahni ber kha, ram roreltu, an duh anga ram rorel thei, ram dan chu an duh dan dana an thuhnuai theih niin an hre tlat zel a. Chutiang a nih loh zia chu democracy kalphung dikah leh kan ram danpui (Constitution)-ahte inziak chiang em em mahse, kan politician-te mai ni lo, thangthar lehkha zir sang, politics lama thiamna sang tak tak neite pawhin, politics lama an thil zirte chu theory mai a taka hman theih loh, a tak (practical) ramah erawh tuna kan ram hruaitute kalphung dik lo hi kalphung dik niin an rawn ngai tlat zel bawk a. Chuvangin kan ramah chuan kan ram hruaitute’n, dan hi ram hruai nan hmang ber loin, a theihna apiangah, a bikin sum nghawng thei hmalakna-ahte dan bum a, pehhel zelin, an duh dan zawkin ram an kalpui ta zel thin a nih hi.
Chutianga Democracy ramah si, dan aia kan mi thlante thu a lo lal zawk tak thinah chuan, Democracy kalphungin tihreh a tum, mahni inhai vurnate, induhsak bingnate, eiruknate a lo hluarin, a nih dan tura thil ni lote pawh a lo hluar ta a. Chutianga kan ram hruaitute dan zawm loh kalphung leh chumi nghawnga thil thalo lo piangte chu, mipuite’n entawnah neiin, kan mimal nun leh khawtlang nunahte kan seng lut a, kan thanhnan ta thung a. Kan ram hruaitute chuan dan zawma ram hruai leh thiltih chu mipuite phurrit siamna mai leh miretheite tan phei chuan tlin chi rual loh tur angin min sawi hlauh ta zawk nghe nghe a nih hi. Chuvanga kan ram leh keini Zofate hi hmasawn thei lo leh hnufual kan ni.
Dan chu engvangin nge ram kaihhruai nan-a hman tur a nih?
Democracy ram chu mipui rorelna ram a ni a. Mipuite ram rorelna thu chu ‘RAM DANPUI’ – he ram a din tirh atanga mipuite lo siam tawh kha a ni! Ram chhung dan siamte zawng zawng hi Danpui mil lo chuan siam thiang a nih loh avangin, mipui rorelna thu chu, ‘Danpui’ ti kher lo pawhin, ‘ram dan’ tih hian a dik tawk hle! Mipuite’n kan ‘ram rorelna’ thu hi a takin keimahni’n kan kengkawh lova, kan aiawha kengkawhtu tur erawh kum 5 danah kan mi duhzawng kan thlang ziah thin.
Hetianga mipui rorelna thu (ram dan) kengkawha, kan ram hruai tura mipuite vekin kan mi thlante hi, ram roreltu atana kan thlan an ni lo va, mipuite rorel (ram dan) kengkawh tura kan thlante an ni zawk. Ram roreltu chu keimahni mipuite kan awm sa a, chuvangin mi dang roreltu an awm thei lo. Mipuite rorelna thu (ram dan) pawh a awm sa a. Tichuan inthlana kan mithlante hna chu, mipuite ‘ram rorelna thu’ hi ram kaihhruai nan-a a taka kenkawh chu a ni ta a. Chuvang tak chuan kan mi thlante hian, MLA /Minister an nih tirh khan Lok Bhavan-ah, ram pum hmuh leh hriatin ‘Ram dan ang zelin ram ka kai-hruai ang’ tiin thu an tiam ta ziah reng a ni. Hei hi kan mithlan (MLA / Ministers)-te hian ram dan hmanga ram an kaihhruai ngei ngei a ngaihna chhan chu a ni a. Chu chu mipui rorel a tak a lo chan theihna bul pawh a ni bawk.
Amaherawh chu, kan politics kal sualah kan mi thlante zawk hian ram roreltu emaw an inti thin a, chu chu mipui min zirtir thin dan pawh a ni. Hei hi a dik lo. Dik ni se, mipui rorel anga ram kai-hruai tura an intiam a ngai nang! Anmahni ngei mipui rorel anga kal turin an intiam a nih hi! Chuvangin Democracy ramah inthlan hmain emaw, inthlan hnuah emaw ram roreltu a inthlak ve ngai lo a, ram roreltu chu mipui kan ni reng! An rorelna thu (ram dan) bak ram rorelna dang a awm thiang bawk hek lo. A awm a nih chuan kan ram chu Democracy ram a ni lo tihna a ni a, party rorel (oligarchy emaw) a ni zawk ang. Chutiang tak chuan ram dan anga ram kaihhruai hi Democracy lungphum a ni.
Dan anga ram kaihhruai hi ram mipuite tan phurrit leh an tlin loh tur chi a ni em?
Ni lo ve! Ram kaihhruai nan ber hman a nih chuan, ram pumah mi zawng zawng, mi lian mi te, NGOs, Officers, MLA, Ministers zawng zawngte’n inang khatin dan kan zawm ang a, phurrit, harsa leh buangbar thlak ti kan awm lovang. Chutiang nunphung chu kan mimal leh khawtlang nunah kan thanhnan thuai bawk ang a. Dan zawm loh chu khawtlang phurrit leh kan tlin loh, khawtlang nun leh ram kalphung chawk khawlo vek tu a nih zia kan hmu chiang chho zawk ang.
Ram kaihhruai nan bera ram dan hman hi hlau ber tur leh dodal nasa ber tur erawh chu, kan politician, kan mi thlan ram hruaitu lo ni tawhte leh, an zara mi lian, hausa leh thiltithei lo ni tawh ho hi an ni ang. Anni ho hi, an dan zawm loh theih bik thinna avanga dan baka mi thiltithei, mi chunga leng leh mi tlawn rawn hlawh, chumi lo hausak pui nasa tawhte an ni a. Dan hi ram kaihhruai nan ber hman a nih chuan, eng anga mi lian, officer, MLA, Minister pawh ni se, mipui mimir angin dan an zawm ve a tul tawh dawn avangin, dan baka an mi bik nih thinna kha a bo tawh dawn a ni. Mi rethei leh mipui mimir zawng zawngte erawh chuan tunhmaa mi chuanhnuai, sawpuitu nei ve lo an nihnate hnuchhawnin, dan chu anmahni sawipuitu a lo ni tawh ang a, dan hmaah chuan mi lian, officers, MLA leh Minister-te nen an intluk tlang tawh bawk ang. Ram hausakna pawh, dawhkan atanga mi liante thlauh chauh chu an chanpual ni tawh loin, a pumin anmahni chanpual a lo ni tawh zawk ang.
Chutiang zel chuan Dan chu ram mipui zawng zawng min chawk chamtu, mi lian leh mi tein inang khata kan zawm tlan vek ngai, duhsak bik awm loa dinhmun inang tlang min petu a ni a. Mi rethei, chanhai leh mipui mimir tan hei aia belh tur tha leh belh tlak thil dang khawvelah a awm thei lo.