Party tana hah taka thawktute chu dan hnuaiah dik tak chunga induhsak theihna a awm chuan an induhsak ve ang tih minister PC Vanlalruata chuan a sawi.
Thawhtannia an party office-a inkhawmah ZPM hruaitu, minister PC Vanlalruata chuan, dik thei ang bera kal an tum mek karah nasa taka beih an tawk tho a, politics-ah chuan hetiang hi thil kalphung a ni tih a sawi. “Lalpa malsawm ram rim nam din kan tum a, ka eiru loang, tia bultantute kan nih angin dik takin kan kal mek a, contract leh supply-ah percent chan ve kan tum lo. Mipui avanga MLA leh minister ni thei kan ni a, ZPM party tana hah taka thawktute pawh an zahawm hle. Dan hnuaiah, dik tak chunga induhsak theihna a awm a nih chuan kan induhsak ang tih ka sawi duh a. Hei hi kalphung dik lo a ni lo. Mahse duham lo ila, eiru lo bawk ila, sem sem dam dam eibil thi thi tih hi kan thupui nise tih hi ka duh ber a ni,” a ti.
Kalphung thar avangin ram mipui an hlim a, he sawrkar hnuaiah hian sawrkar hnathawkte pawh mipui tana biak nuam leh an thawhchhan ang ngeia mipui tan thahnemngai lehzuala thawk turin a duh tih a sawi bawk.
Chief minister-in chief minister tha bik a nih zia a lantir mek a, budget la pharh ve ngai loin an pharh ve ta a, leiba ngah tak chunga bul tan an nih zia hretu an ni chungin, health care bill ba cheng vaibelchhe 65 pek a ni a, eng chhit man vaibelchhe 83 chuang pek a ni tih minister hian sawiin, “Hma thar lak tur tam tak chhawp mek a ni a, thla 4 chhung leka he sawrkar chetna avangin ram mipui an hlim a, an lung a muang. Thlai thar pali – sawhthing, hmarcha, aieng leh hmunphiah kan lei dawn kan ti a, kan intiam ang ngeiin kan lei dawn. A bikin sawhthing chin tum an tam a, a chi ringawt pawh lei tur tunah a vang tawh. Lo ching ula, kan lei ngei ang tih kuthnathawktute kan chah nawn a ni,” a ti.
Buh leh bala intodelhna tura ruahmanna an siamah kalphung thar mipui sawrkar chuan eptu bial an thliar dawn loa, kan zavai huap a nih dawn avangin taima apiang an hlawhtling mai dawn tih a sawi a ni.
Dan dik taka induhsak theihna a awm chuan kan induhsak ang – PC Vanlalruata
