Sawrkar hmasa hunlaia SEDP hnuaia health clinic centre din ho chu dan ang niloa din a ni tih Health & Family Welfare minister Lalrinpuii chuan a sawi a. A zirchiannaah Health department chu tlusawp mai hlauhawm khawpin a lo awm tawh tih a sawi.
Ningania Assembly Session-a zawhna leh chhanna hunah Health minister chuan SEDP clinic centre 245 din chu dan loa din a ni a, SEDP a awm tawh bawk si lo nen, thawktu an pe thei loa, thawktu indaihlohna a awm phah tih a sawi.
SEDP hnuaia health worker lakte chu sawrkar hmasa hunlai, 2023 November khan an hun a tawp a, sawrkarin chhawr chhunzawm a tum lo tih a sawi.
“Mizoram health care hi ka’n luhchilh tak tak a, ka han zirchianna atangin kan chief minister hnenah pawh kan lo tlusawp tep tawh a ni, tiin report ka pe tawh. Thawktu kan indaih hunah chuan sawrkar hmasa in CHC-a a lo hlankai tawh zawng zawng pawh a nih tur ang taka function tir tum a ni,” a ti.
Dan lo ang vekin thil tam tak an lo kalpui thin tih Health minister hian sawiin, CHC (Community Health Centre) 9 neih tawh sa bakah 2023 MLA inthlan dawn hnaih lamah PHC 7 chu CHC a hlankai leh a ni a, thawktu an indaih si loa, sawrkar lu a tihai hle tih a sawi. PHC leh CHC te a nih dan tur anga function tir an chak em em rualin, sawrkar sum indaih lohna avangin function tha thei rih lo tam tak a awm tih a sawi a ni.
SEDP health worker chhawrte tihtawp chungchangah leader of the opposition Lalchhandama Ralte chuan, sawrkar hmasa in November thla tawp thleng hlawh siama a titawp anga sawi chu tihtawpna order sawrkarin a siam reng em tih a zawt a. Siam a nih chuan a copy pe turin a ngen. “Hlawh bi hi quarterly zela siam a ni a, November thla thleng quarter siam bak kha sawrkar thar hian an hlawh tur a siam ve loh vang a ni zawk em” tiin a zawt bawk.
Health minister sawi dang:
8 ZMC tana sawrkar laipuiin special package a pek turah mamawh hmasa ber, thawktu indaihlohna phuhru turin first phase-ah DPR siam turin an ti a. Cheng vaibelchhe 1.9 senna tur project thehluh theihin an peih tep.
8 CT scan hi Civil Hospital Aizawl, State referral Hospital Falkawn, Mizoram State Cancer Institute leh Lunglei Civil Hospital ah a awm a, a hman theih vek a ni.
8 ZMC chauhin a neih mek MRI khawl chu Civil Hospital Aizawla dah turin Smart City Project atanga lei a ni dawn.
8 Mizorama Infant Mortality Rate chu naupiang 1000 zelah 3 thi ang an ni.
8 Tun dinhmunah Mizoramah Health & Welness Centre (HWC) 391 a awm. Primary Health Centre (PHC)/ HWC 54, Sub Centre/HWC 319, Urban PHC/HWC 9 leh Urban HWC 9 a ni.