Sakhaw te zawk leh hnam tenau zawkte chu BJP sawrkar hnuaiah hian dan hmanga rahbeh leh thliar bik kan ni mek tih Congress thupuangtu Dr Lallianchhunga chuan a sawi a. Ram, hnam leh sakhua himna turin Congress party a sawrkar a ngai tih a sawi.
India ram tan dan pakhat (One Nation, One Law) chauh hman a nih theihna turin Uniform Civil Code (UCC) chu BJP-in a buaipui mek thu leh ram leilung fate rahbeh tumna Forest (Conservation) Amendment Act 2023 pawh an kalpui tih MPCC Media Department chairman ni bawk Dr Lallianchhunga hian sawiin, an party-in central leh Mizoramah sawrkarna a chan chuan UCC leh Forest (Conservation) Amendment Act 2023 hi hnam tlem zawk leh sakhaw dang tan a him loh avangin an thiat dawn tih a sawi.
UCC hman a nih chuan inneih leh inthen, ro khawm leh fa lak chungchangah dan inang tlang kan hman a ngai tawh dawn a, kan hnam tihdan phung (customary law) leh kan Kristian dan chuan awmzia a nei tawh dawn lo tih a sawi.
Tunhnaia inhnialna awm mek, Narendra Modi sawrkar chuan “India” tih chu ‘Bharat’ tiha hman turin a thlak dawn nge tih sawichian theih loh a ni mek bawk tih Congress thupuangtu hian sawiin, official-a ‘Republic of India’ tih thlak danglam tur chuan Article 368 hmangin India Danpui siamthat a ngai dawn a. A duh chuan majority a neih tlat avangin BJP hian Special Session of Parliament neih turah a thlak thei tih a sawi a ni.
“Kan hnam lungphum pawimawh tak hi BJP sawrkar hmalakna hrang hrang hian a sawinghing mek a. Hnam tenau leh sakhaw dang betute namnul a, ‘hindutva’ kalpui tum BJP hi India ram leh Mizoram tan pawh a tha lo a. A bikin Kristian-te tan him lo tam tak a awm avangin Mizoram mipuiin BJP leh a thawhpuite paihthla a, sakhaw zalenna duhtu Congress party thlawp turin kan ngen a ni,” a ti.
Dan hmanga rahbeh leh thliar kan ni mek – MPCC thupuangtu
