Mizoram Police chuan Manipur buaina kaihhnawih zelah Mizorama dan leh thupek kenkawh kawngah uluk taka beng chhi reng turin an inchah thar.
July 25-a NGO Coordination Committee-in Manipur-a Kuki-Zo hnam thlawpna kawng zawh huaihawt an tum chungchangah Mizoram DGP Anil Shukla hoin venhimna kawnga hmalakna hrang hrang thlirlawkin Inrinni khan police hotute an thukhawm a. Venhimna kawnga hmalakna hrang hrang rela thlirho niin, Mizorama khawsa Meitei-te himna kawnga hmalakna thlirnawn a ni.
DGP chuan thil tha lo thleng a awm lohna turin venhimna kawngah theihtawp chhuah a ngai tih sawiin, Mizoram hmun hrang hranga mahni huamchin theuhah Manipur buaina kaihhnawiha thil duhawm lo thleng a awm lohna turin mi leh sa, lirthei leh ruahmanna felfai nena inring renga awm turin police officer-te a chah.
Thutkhawm zawh hian Aizawla kawng zawhna hmun tur Chanmari, Kulikawn leh Raj Bhavan gate te tlawhin a hmunah ruahmanna siam dan te an enho.
Mizoram Police chuan sawrkar thuneitute nen tha taka thawkhoin Mizorama Meitei-te himna a ngaipawimawhin uluk takin a vil reng tih a sawi a. ‘Khua leh tui zawng zawngte himna hi Mizoram Police chuan a ngaipawimawh em em a, kan ram chhunga remna leh muanna chhawmnun kawnga min thawhpui zel turin tlawmngai pawl leh mipui kan sawm nawn a ni,’ a ti.
Dan leh thupek kengkawh tha turin police inchah
