Dan lo anga kawng laih titawp
tura hmalakna a beitham hle – CESJ
Aizawl bypass road (western side) laih meka forest clearance neih loh leh Aizawl chawmtu Tlawng tui ti nu zawnga dan loa leivung paih a nihnaa hma la tura an ngenna bawhzui a nih dan a beitham hle tih environment humhalhtu pawl CESJ chuan an sawi.
Centre for Environment & Social Justice (CESJ) thuchhuak chuan, kumin September 15 khan DFO Aizawl Forest Division hnenah Tlawng Riverine Reserved Forest (RRF) paltlanga ‘Aizawl Bypass on western side’ kawng laih mek chu forest clearance nei loa hna thawh a nih avang leh an leivung hnawl thlak chuan Aizawl khawpui tui tlan, Tlawng lui tui pump theih loh khawpa a tihnut thin avanga titawp (stay) turin ngenna an thehlut a ni.
An ngenna bawhzuiin Aizawl Forest Division hnuaia range officer leh Aibawk Forest Range chuan September 18 khan project implementing unit (PWD) project director hnenah RRF huamchhunga leivung paih chu titawp turin an hriattir a. Lawmawm an tih rualin, hetiang hnihnea FCA 1980 leh Environment Protection Act 1986 bawhchhetute chunga environment venghimtu hmalakna chu an duh khawp lo hle tih a sawi.
Chutih rualin tlang hriata Aizawl tui tlan ber Tlawng lui tui pump theih loh khawpa leivungin a tinu thin chung a, a tinutu /leivung paihtu leh mipui tana harsatna thlentute zawng chhuaka action latu tur ni awm tak, PHE department leh Mizoram Pollution Control Board atanga hmalakna mipuiin kan hre ngai lo chu mak an tih thu a sawi bawk.
‘He kawng laitu, Mizoram PWD hian hnathawh tan hmaa forest clearance hmu thei turin an inhmakhua duh loa, tlaikhawhnuah an dil chauh tih RTI dan hmanga zawhna chhanna atangin kan hria a. Forest ram paltlang tur kawng (leh linear project dang pawh) hi forest land leh non-forest land laiah clearance hmuh hmaa hna thawh tan hi FCA danin a phal loh avangin, kawng laih mek hi dan bawhchhiatna lian tak, sum tam tak chawi belh theihna a ni. Hei hi DFO Aizawl-in he kawng laih mek a stay chhan lian ber tur leh umzui thuai ngai thil a nih lai a, a hnuaia Aizawl leh Aibawk RFO-ten leivung paih chauh atana stay order an pe hi Forest phatsanna hialah kan ngai a ni,’ a ti.
Tlawng lui humhim sak tura National Green Tribunal an ngen a nih chuan, DFO Aizawl Division Environment Forest & Climate Change department leh a naute chu respondent no.2 tur an ni dawn tih CESJ chuan a sawi lawk bawk.
Dan lo anga kawng laih titawp tura hmalakna a beitham hle – CESJ
