Champhai khawpui chhunga hnamdang, dan loa sumdawnna kalpui an awm leh awm loh enfiahin Inrinni khan Champhai MZP an thawkchhuak a, Myanmar atanga raltlante an awmna hmunah tlawhin dan lova chetna laka fimkhur turin an hriattir.
MZP Hqrs.Champhai hian, non-Mizote, Mizorama zalen taka sumdawng a, lirthei hmanga bungrua an zuar kual thin chu dan kalh a ni, tiin, nasa taka dolet a tum bakah inner line permit-in a huam chin bak Mizorama awm phal a nih loh thu non-Mizote an hrilhhria a, two wheeler taxi driver zingah pawh India mi nihna nei lo, raltlan zingah driving licence neia lo service ve mek an awm leh awm loh pawh an enfiah a ni.
Zote khaw dai, Fianrial tlang bul, ITI building-a Myanmar raltlante awmna hmun chu MZP hruaitute hian tlawh nghalin, he hmunah hian raltlan 116 an awm a. Mizoram sawrkar, kohhran leh NGO hrang hrangin tha taka an lo dawnsawn thute hrilh an nih rualin, India khua leh tui chauhin an neih theih photo identity card, driving licence, Aadhaar card, ration card, birth certificate te neih tum ve lo turin an chah. Ruihhlo tawlhnaa inhnamhnawih lo turte, mi huan lo rama thlai, sangha khawi leh thil dangte a ruka laksak lo turin an hriattir bawk.
Dan loa chetna endik
