Dan loa hnamdang sumdawng dapchhuaktu veng an fakawm – MIMA

Dan loa hnamdang sumdawng
dapchhuaktu veng an fakawm
– MIMA
Sumdawng pawl intelkhawm MIMA chuan Chhinga Veng khawtlangin an huamchhunga dan loa hnamdang sumdawng dapchhuah kawnga hma an lak dan chu fakawm an tih thu an sawi.
MIMA thuchhuak chuan, Chhinga Veng Local Council leh NGO – YMA, MUP leh MHIP chuan October 18- 20 khan tum thum an veng chhunga dan loa sumdawng, Mizo hming hawha sumdawng leh an ‘work purpose’ ang loa sumdawng endikin mi 5 an hmu chhuak a, October chhunga an dawr titawp turin an ti tih a sawi.
‘Hetianga hma an la hi a ropui a, Mizorama sumdawngte leh kan hnam tan a hlu takzet. Lawmawm kan tiin an hmalakna kan thlawp a ni,’ a ti.
Mizoramah sumdawnna kawnga inchimralna (economic assimilation) a thleng mek zel tih MIMA hian sawiin, ‘All Mizoram Cement & Iron Rod Dealers Association hruaitute chuan iron rod leh cement zuar bikah phei chuan Mizo dik tak hi a zuarteah zaa 20 pawh an awm tawh lo niin an sawi,’ a ti.
Eichawp zuar dawr lian tam tak pawh hnamdang leh Mizo hming hawh an tam hlea a hriat thu MIMA hian a sawi a. A chhan pawh, Covid hrilen laia veng hrang hranga eichawp dawr siamhoin an khar chhawnna dawr chu hnamdang dawr deuh vek ni maia hriat a ni tih a sawi.
Hnamdang hnena Mizoten kan hming hawhtir a, hnamdangin sumdawnna an kalpui hlauhawmna tak Mizoten kan la hre lo hle tih sawiin, ‘Mizo hminga GST register leh company lam thil lakna register-na hming (proprietor) Mizo hming Vaiin an hmang lo thei loa, leiba neitu chu Mizo a lo ni ta a. Leiba a tam a, buaina a awma Vai/ hnamdang kha a tlanbo palh chuan Mizo, hming hawhtirtu khan a tuar dawn a ni. Hming hawhtirna man sum tlemte um avangin thubuai rip tak leh leiba rip tak neih theih a ni,’ a ti.
Tuna tih takzeta Chhinga Veng Local Council leh Joint NGO-in an venga hnamdang sumdawng endika an chetna avang hian Mizoram tualchhung mi tan kawl a eng leh dawnin MIMA chuan a ngai tih a sawi.
‘Sumdawnna kawnga chimral kan nih tan mek laia hetianga chhan chhuah hna an thawk hi an entawntlakin, Mizoram khaw tin, Aizawla veng tinin ti ve thei ila a duhawm hle,’ a ti.
Building neitute pawhin dan loa sumdawngte an building luahtir lo a, hnamdang luahtir lo turin MIMA chuan Mizo mipui a ngen tih a sawi a. Kan state thenawmte sumdawnna kawngah chimral an ni deuh vek tawh tih hria a, chimral kan nih ve mai lohnan tan la thar turin Mizo mipui an ngen tih a sawi a ni.