Mizo Students’ Union (MSU) chuan, RTI hmanga zawhna Local Administration Department (Directorate) in a chhan dan tlawhchhanin, tun dinhmunah Mizoram chhungah dan loa din khaw 11 a awm mek, an ti a. Kumin chhung ngeia tihtawp a nih theihnan hma la turin Mizoram sawrkar a lo ngen tawh tih sawiin, hemi bawhzuina atan dan loa khaw dinah hian sawrkar development (school, power supply, health, water supply etc) a awm em, tih leh, tute nge cheng, tih an enfiah dawn a ni.
Dan lova khaw din chungchangah hian kum sawm hma lam daih atang tawh khan MSU hian hma a lo tawh thin a, a ngai pawimawh zawk tura ngaih sawrkar hian ‘dan lova khaw din’ te hi a ngai pawimawh lo hle tih a lanna chu, tun thlenga ‘dan lova khaw din 11’ zet an la awm theih atang hian a ni. Khua a lo ding a, naupang an lo awm neuh neuh a, SSA lamin school an lo din vat a, engtin tin emaw ni a lo thang zel a, a tawpah VC hrang nei thei hial khawp ten an lo awm a, dan kalha khaw din a nihna lam hriat zui a ni tawh lo mai thin a ni awm e.
Dan lova khaw din hi Lushai Hills kan nih lai kum 1904 vel atang daih tawh khan a lo awm tawh a. Khatih laia Mizoram (Lushai Hills) awptu J.Shakespear, Major, Superintendent khan phalna la lova khaw din thiahna tur ‘Order’ (Order No 3: Punishment for creating a hamlet without permission. Aijal, The 21st May 1904) a lo chhuah tawh a. Kha Order-ah khan, Champhai road-a khaw dintu mi pasarih te chu Rs 10 theuh a chawitir a. Heng mi pasarihte hi, Mizo (Lushai)-4, Khasi-2 leh Gurkhah-1 an ni. Pawisa an chawi bakah hian, an in leh lo halral vek a ni a, khaw dintute pawh hi khaw hrang hrangah an sawn darh vek bawk. (Source- Compendium of Standing Orders of the Superintendents of Lushai Hills 1904-1921; Published by P.Rohmingthanga & Michael Zothankhuma)
Tunah chuan keimahni ngeiin ram inawpna leh ram inrelbawlna kan thawkin kan kengkawh tawh a ni a, J.Shakespear-a te mahin khitiang khawp khian ram min lo humhalhsak a, dan an lo kengkawh tha a. An hniakhnung zui a, an tih dan tha entawn tur kan nih vei nen, a civil mite zawkina nawr kal ngai anga ram hruaitute, dan kengkawhtu leh thuneitute an awm tlat thin hi chu, inenfiah an mamawh ve deuh chu a ni lawm ni a tih theih awm e. Ram leh hnam hmangaihna tak tak rilru nena kan ram hi an enkawl a, an kaihhruai a pawimawh takzet a ni e.
Dan loa khaw din leh a behbawm
