Dan loa lak an awm inhre lo
Casual leave lak tintuah mek
Mizoram sawrkara thawk CSS employee zingah dan loa lak an awm an inhre loa, thil phut neia hna thawk loa pisa kai chuan awmzia a neih loh chuan mass casual leave lak an tum tih an sawi.
All Mizoram CSS Employees Coordination Committee (AMCECC) chuan sawrkar laka lungawiloh – pen/ tool down strike a neih mekah member-ten an thlawp tha chu lawmawm a tih thu a sawi.
Nawrh hnuah sawrkarin inbiakna mumal engmah a la neihpui loh laiin, chief secretary charge la mektu in CSS hnuaia dan loa lakte chu dahngheh theih an nih loh thu a sawi leh, AMCECC thil phut an tih hlawhtlin chuan India danpui bawhchhiat a ngaih dawn thu a sawi chu hriatthiam har an tih thu an sawi.
CSS-te dinhmun hrechiangtu sawrkar hian CSS-te dahngheh theihna tur dan ‘Govt. of Mizoram Regularization of CSS Employees Scheme 2024’ chu duhsak takin a siamsak a, he dan hi a taka an hman theihnan chief minister pawhin a theihna dan zawng hram hram tura thuneitute a chah laiin, dahngheh theihnan hma la loa, a harsatna leh a theihloh dan zawn sak zeltu an la awm fo chu an duhlo takzet tih an sawi a ni.
‘Mizoram sawrkar hian a duh chuan CSS hnuaia thawkte a lo dah nghet fo tawh a, keini aia mumal loa lakte pawh dahngheh an lo ni tawh thin,’ AMCECC hian a ti.
AMCECC member zingah dan loa lak an awm an hre loa, sawrkar appointment order mumal tak nei veka lak an ni tih sawiin, ‘Dan dik loa lak kan awm a nih chuan, dan loa min latu chu sawrkarin chhuichhuakin, a mawhphurtute chungah na taka hma la turin kan phut a ni,’ a ti.
CSS hnuaia thawkte chu thalai lehkhathiam, an hun tha leh theihna, an vanglai hun zawng zawng hmangrala Mizoram tana thawk an ni tih a sawi bawk.
Thil phut pathum neia nawrh mek chuan awmzia a nei lo a nih chuan, April 21-23 chhung mass casual leave laa nawrh chhunzawm an tum tih an sawi a ni.
Dan loa lak an awm inhre lo Casual leave lak tintuah mek
