Dan loa sumdawng hnamdang
dapchhuak tumna thlawp
Mizo Zirlai Pawl chuan dan loa sumdawng hnamdang dapchhuah an tum a. Muslim Welfare Society Mizoram leh Central Mizoram Gorkha Youth Association chuan an thlawp dawn tih an sawi.
MZP Gen. Hqrs. chuan Muslim Welfare Society Mizoram leh Central Mizoram Gorkha Youth Association hruaitute joint meeting a neihpui a. Mizorama hnamdang dan loa sumdawnna kalpuite MZP-in dapchhuah a tumna chu tha an tihpui thu sawiin, a tul anga MZP hmalakna tawiawma thlawp nise an ti.
‘Tunhnaiah hnamdang dan loa sumdawnna kalpui a tamin a hluar hle a. Mizo hming hawha sumdawnna bakah state pawn atangin mantlawm te tein phalna neiloten Mizoramah sumdawnna an kalpui nasa a, an bungrua an hralh zawh hunah an haw leh mai zel tih hriat a ni. Hei hi tualchhunga Mizo sumdawngten an tuar hle a, nghawng lian zawk a neih hmaa tihtawp a nih theihna’n hma lak tum a ni,’ MZP chuan a ti.
Hnamdang dan loa sumdawnna kalpuite dapchhuah chungchang hi kumin February 9-a MZP Special Assembly-ah rel a ni a. “Mizoram chhunga hnamdang dan loa sumdawngna kalpui mekte dapchhuah nise, Mizoram sawrkarin a tihtawp theihna’n hma lak ni rawh se” tih bawhzuina a ni.
Dan loa sumdawng hnamdang dapchhuak tumna thlawp
