Tunhnaiah Mizoram Police leh midangin dan phal loh thil tawlhruk hrang hrang an man.
June 6 zingkarah E. Lungdar Police Check Post duty-te chuan kuhva ro, bag 150 (kg. 7500) chu lirthei pahnih – MZ04 A 4629 leh MZ04 A 6453, Thangtinkapa, Leisenzo leh T Chhuanliana, Sesih Champhai district ve ve nia inchhalte khalh atangin Chhura Lung junction, E. Lungdar khawdaiah an man. Kuhva rah mante hi district magistrate hriattirna dinglai angin dan phal loha phurh, dan anga hma lak zui turin Serchhip district magistrate kutah an hlan.
June 6 vek khan Champhai Police chuan Chalbawia Junction Khankawn Police Check gate-ah heroin nia hriat, kg 1.902 (hawng 156) a rit chu i-10 car MZ01 L 4077, Lalnunpuia (42) Zokhawthar, tuna Hunthar Veng Aizawla cheng inti kut atangin an man a, thubuai siamsak a ni. Ruihhlo hi a car kawngkhar chhunga thuhruk a ni.
June 5 zan khan Lunglei District Special Branch chuan an thudawn bawhzuiin, heroin nia gram 116 (hawng 10) chu Francis Lalramthanga (42) Bazar Veng Lunglei nia inchhal kut atangin Lunglei Venglai huamchhungah an man a, thubuai siamsak a ni.
Bilkhawthlir Kuhva Chingtu duty-te chuan Zirtawpni zing khan dan loa kuhva ro tawlhruk, Kharzawl Bilkhawthlirah Assam state registration car pahnih atangin an man a, car pahnihah hian bag 8 ve ve man niin, Mizoram registration car dang atangin bag 4 an man bawk. Tunhnaiah Myanmar kuhva ro tawlhruk tumna atan LMV – car leh pik up hman an uar hle tih an sawi a. Heng lirthei hi lirthei lian kal theih lohna, Assam lam pawhna kawngtum hrang hranga kuhva ro a ruka thiar nan an hmang thin tih an sawi.
Dan loa tawlhruk man
