Mizoram sawrkarin Central Bureau of Investigation hnena an thil chhui duhah phalna pek hmasak kher ngai loa a duh a chhui theihna – ‘general consent’ a lo pek tawh chu criminal law hman thar hnu ah a thara pek that a ngaih avangin tunhnaiah general consent hi pek nawn a ni tih sawrkar chuan a sawi.
Vigilance department thuchhuak chuan, ZPM party-in MLA inthlan dawn laia mipui hnena a intiamna angin, sawrkarna a chan hnu, 2023 December 28 khan CBI hnenah general consent a lo pe tawh a. Tunhnai, 2024 July 1 khan India ram puma hman turin criminal law thar – Bharatiya Nyaya Sanhita 2023 chu a lo chhuak a, chumi zulzui chuan Ministry of Personnel, Public Grievances & Pensions hnuaia Department of Personnel & Training chuan CBI-in a chhui theih tur ‘offence’ hrang hrang chu a tharin a chhuah a. Hetianga dan thar hnuaia CBl-in offence a chhui theih tur a thara an chhuah tak avang hian state sawrkarin a hmaa CBI hnena general consent a lo pek kha pek thar leh a ngai ta tih CBI director-in state sawrkar a rawn hriattir tih a sawi a ni.
State sawrkarin general consent a pek dan tur pawh ruahman sa a rawn dah tel a. CBI director-in state sawrkarin general consent a pek dan tura ruahmanna a rawn siam ang thlapin kumin June 27 khan Mizoram sawrkar chuan CBI hnenah general consent a pe thar a, July 1 khan official gazette-ah tihchhuah a ni tawh tih a sawi.
‘Hetianga a thara Mizoram sawrkarin CBI hnena general consent a pek leh a ngaih chhan chu, dan thar hman a ngaih tak vang a ni a. Tunhmaa Mizoram sawrkarin general consent a lo pek leh tuna a pek thar leh hi thil thuhmun reng a ni a, sawrkar chu a dinna ngaiah a la ding reng a ni,’ a ti.
Dan thar vangin CBI hnenah general consent pek thar ngai
