BFF tia social media a sawi thin hi best friend forever tihna a ni a, Thailand rama lo neitu pakhat tan erawh ‘buffalo friend forever’ tihna a ni daih thung!
Thai lo neitu, Chainat province-a cheng, Surat Paewkate hian lawi note, a hminga Thong Kham tia a sak chu a la a, a enkawl seilian a, tunah chuan lian tak a ni tawh.
Kum 34 mi, Paewkate hian a lawi hi a duat khawp mai a, an inenkawl nasa bawk a, a lawi pawhin a lo hre thiam khawp mai a, tunah chuan inthian tha tak an ni tawh.
“Thong Kham hi a fel a, min tihlim em em a ni,” a ti a. “Ka lova kalpuite hi nuam a ti a, a chunga ka chuante hian a hlim thei em em a ni,” a ti bawk.
Paewkate hian a thian nena an selfie-na hrang hrang chu vantlang inbiakpawhna lar, Facebook-ah a dah chhuak a, heta tang hian an inkawmngeih dan hi khawvelin a hre chhuak ta a ni. A thlalakte chu a darh chak ta hle a, tunah chuan amah leh Thong Kham hi Thailand-ah chuan ‘internet celebrity’ an ni der tawh.
Paewkate-a sawi dan chuan an selfie dawn hian a thian hian a hre thiam chiah lo va; mahse, amahin vawi khat a tih hnuah a lawi pawh hian a in-pose dan ang chiahin a ti ve nghal niin a sawi.
Dangdai : A thiantha ber chu Lawi!
