Srushti Sudhir Jagtap, kum 16, chu darkar 127 chhung chawl lovin a lam a, Guinness World Record a siam. A hmaa hetiang record chu Napalese dancer Bandana Nepal siam niin, 2018 khan darkar 126 lamin record hi a siam a, tunah he Indian tleirawl hian record thar a rawn siam ve leh ta a ni.
GWR Official Adjudicator Swapnil Dangarikar chuan Shrusti hian an college auditorium-ah record hi siamin, mi thahnem takin an tawiawm reng niin a sawi a, “A hah lutuk chang te a awm a, mahse, a chhungte a kiangah an awm reng a, a intihharh theih nan a hmiah tui ten an lo phuh sak thin,” a ti.
Shrusti hian May ni 29 zingkar atangin record siam tumin a lam tan a, June ni 3 chawhnu lamah a zo a, Guinness World Record a siam ta a ni. A record siam hnuah hian a mu nileng thak a ni awm e.
Shrusti hian Kathak lam chu record siam nan hian a hmang a, Kathak chu Indian classical dance niin, kut leh ke tih chet nasat ngai tak mai a ni. Shrusti chuan, “Indian culture tihlar ka duh a ni,” a ti.
Record siam tum hian thla 15 chhung a inbuatsaih a, Yoga Nidra a hmang a nitin darkar li chhung meditation tiin, darkar 6 a lam a, darkar 3 exercise a la a, zanah darkar 5 a mu thin.
Shrusti chuan, “Ka taksa bunghrang zawng zawng hi a khawngin a na vek mai. Mahse, rilru lamah chuan ka tumah ka chiang a ni. Ka lo inbuatsaih nasat tawh avangin ka rilru leh taksaa danglamna awm ka hre thei em em a, chu chuan a tawp thleng thei turin min pui a ni,” a ti.
Darkar 127 lam an tih hian Guinness guideline-ah chuan darkar khat lamah minute 5 zel chawlh an nei thei a, an chawlh neih hi hmangin nghal lovin an khawl thei a, Shrusti pawhin a chawlh neih te khawlin zanlaia han mutthluk lawk nan, han inthinharh nan te leh ei leh in leh bathroom break atan te a hmang thin a ni.
Darkar 127 lamin record a siam
