Darkar 18 hnuah rangkachak khura tangte chhanchhuak
Colombia hmarthlang lama rangkachak laih chhuahna khura thawktu tang mi 18 chu darkar 18 chuang an tan hnuah emergency crew-ten an chhanchhuak thei ta tih an ram sorkarin a puang.
Thil lai chhuaktute hi Ningani atang khan El Minón mine, Colombia-a Antioquia region-ah an hmanrua a chhiat avangin an tang tih AFP news agency chuan a tar lang.
Darkar 12 chhung chhanchhuah tuma beih a nih hnuah dam takin an la chhuak ta tih Colombia-a National Mining Agency (ANM) chuan a sawi a ni.
Remedios-a mayor-in sorkar hnena lehkha a thawnah chuan khur hi phalna nei lo a nih thu a ziak tel.
Khura tangte chhanchhuah hna hi Zirtawpni zing dar 03:00 (India-a tlai dar 02:30)-ah an zo chauh niin Colombian energy minister chuan a tar lang bawk.
Chhanchhuah hna thawh lai video darhah chuan lak chhuah an nih lai hian an thawhpui mi dangten lawm takin kut an lo beng a ni.
Tual chhunga miner-te pawl aiawhtu, Yarley Erasmo Marin chuan lei min thei venna atana an hman khawl hian hna a thawh theih loh avangin a chhuahna tur chu a dang ta tih AFP news agency a hrilh.
Chhanchhuah hna thawh a nih chhung hian tangte hi hose hmangin oxygen pek an ni tih tual chhung radio station ABC chuan a tar lang.
ANM chuan thuchhuah an siamah thil lai chhuaktute chu ‘phal lohnaah chuan himna leh nunna atana hlauhawm a nih avangin hna thawk lo turin’ an ngen a. Chhiatna a thlen hian an ram eibar leh hmasawnna pawhin a tuar thin niin an sawi.
Colombia-ah hian thil laih chhuahnaa chhiatna thleng hi a awm fo tawh thin a, thihna pawh a thleng fo tawh thin a ni.
Darkar 18 hnuah rangkachak khura tangte chhanchhuak
