Darkar 25 hamin, tawtawrawt ham rei record siam
Nigerian musician Joshua Olusanya chuan darkar 25, minute 30 leh second 36 chhungin tawtawrawt a ham ngat ngat a, Guinness World Records a siam. He record hi May ni 9 a siam kha niin, Guinness hian record a siam thu tun weekend kalta khan an puang a ni.
Joshua hian a record siam chu khawvel hmun hrang hrang a music zirna chawi lar nan leh mi ten an thil suangtuah leh tihchak te ti tura huaisenna an an neih theih nana a tih niin a sawi.
Joshua hi musician a nih bakah music director leh band director a ni tel a, tawtawrawt hi kum 14 chhung a lo play ve tawh a, chuti chung chuan vawiin thlengin tawtawrawt ham nuam a tihna leh a ngainatna chu a la pung telh telh zawk niin a sawi.
Joshua hian a hma pawhin record siam tumin a lo bei tawh a, mahse, a tihdanah dik tawk lo awma an hriat avangin Guinness lamin an pawm sak thei lo a, tunah chuan Guinness inkaihhruaina ang thlapa tiin record a siam ta a ni.
Guinness guideline-ah chuan darkar khatah minute 5 zel chawlh a nei a, chung minute 5 chawlh a neih chu a khawl thei bawk. He chawlh a neih chhung chiah hian zunram thiam leh ei leh in te a tih vek a ngai a, hei bakah hian a tawtawrawt hman chuan awmzia a nei tur a, hla play a nei ngei a ngai a, a ri hriat thamin a ham ngei a ngai bawk.
Darkar 25 hamin, tawtawrawt ham rei record siam
