Darkar 84 chhung indoor rowing tiin record siam

Darkar 84 chhung indoor rowing tiin record siam
India mi, UAE a hnathawk a awm, Daksh Chahal, kum 23, chuan darkar 84 chhung indoor rowing tiin, Guinness World Record a siam. Daksh Chahal hi strength & conditioning coach niin, Dubai-ah hnathawkin a awm a, hetiang ultra-endurance record hi Guinness World Records-ah pawh a hmain a la awm ngai lo a, Daksh hi a hmasa ber a ni. Indoor rowing tih hian, exercise lak dan hahthlak tak, lawngkar anga exercise lakna, Concept2 rowing machine a hmang a ni.
Daksh hian rowing exercise machine hmangin record hi a siam a, Danube Sports World-ah karkalta Nilaini zing dar 8:20-ah tanin, Inrinni zing dar 8:20 thleng indoor rowing hi a ti ta ngat ngat mai a ni. Record siam tuma a beih chhung hian a mu miah lo a, vawi khat a inbual a, a chau tawngkhawngin tum hnih thil hmuhsual (hallucination) a nei hman bawk. Guinness guideline-ah chuan darkar khat rowing a tih apiangin minute 5 zel chawlh a nei thei a, a chawlh neih hi a khawl thei bawk a, hemi chhung hian ei leh in, zunram thiar leh a mamawh thildang te a tih vek a ngai a ni.
Daksh chuan, “Kan theih tawk, tlin tawk leh tih theih chin ni a kan hriat hi rilru lamin a hril thui hle a ni. UAE leh khawvel hmun hrang hrang a infiammi te hnenah inbuatsaihna tha leh mahni inrintawkna kan neih chuan theih loh tur ni a miten an ngaih pawh kan ti thei tih hi entir ka duh a ni,” a ti.
Daksh chuan Concept2 rowing machine a hmanna chhan chu gym a cardio machine hautak ber a nih vanga thlang niin a sawi a, “Ke, ban, hnungzang, dul, lung leh chuap te an tan vek a ngai,” a ti.
A hmain hetiang record hi a la awm ngai loh avangin category thar siam turin kar 10 a nghak niin a sawi a, Guinness lamin record siam tur chuan darkar 80 tal indoor rowing hi tih tur niin guideline an rawn siam a, Daksh hian darkar 84 tiin record a siam ta a ni.
Record siam turin darkar 84 indoor rowing a tih chhung hian darkar khata km 7-8 ang vel a pha char char a, Guinness guideline-ah chuan 5kmph tal a tling tur a ni. Daksh hian darkar 84 chhung hian calories 29,200 a burn man a, a taksa rihna pawh kg 4-in a tlahniam hman a ni.
Daksh chuan record siam tum hian thla ruk vel a inbuatsaih niin a sawi a,darkar 6-8 rowing session baka mobility work, weight training, leh rlru sawrbing lam te pawh a inpuahchahnaah hian a tel. Record siam tuma a beih hma kar hnih vel atangin a zan mut pawh a titlem a, zan khatah darkar 2-3 chauh a mu thin a, hei hian record siam dawna a mutchhuak lutuk tur a veng dawn niin a ngai a ni.
Daksh chuan a darkar 24 hmasa lam chu harsatna awm lovin a ti thei mai a, mahse, a zan hnihna chu a sak ta talh mai a, a record siam chhunga hun harsa ber ni a a hriat thu a sawi. “Ka taksain tlin loh hun a nei dawn tih chu ka ria a. Mahse, ka rilru lamin a zuam a ngai a, chutiang tur chuan ka inzir a ni,” a ti.
A zan hnihnaah a mutchhuak lutuk leh taksa hahin thil a hmusual nawk nawk a, a camera hunna lam a en chuan hmeichhe pakhat amah hnungchhawn zawnga ding angin a hmu tlat a, tum khat leh pawh witness seat-a a hmaa thu hnungah chuan zawng lian chi, gorilla awm angin a hmu tlat bawk. Mahse, hetianga thil a hmuhsual hian a intihharh a ngai tih inhriain, a earphone a music a ngaihthlak chu titawpin, amah tawiawmtu, witness-te chu a titi pui ta zawk a ni.
A tawp lam ni hnih chhung chu doctor-in a thutchilh a, ani hian a BP leh oxygen level te a endik sak reng a, Daksh chuan, “Engkim a normal range chhunga a awm reng thei kha doctor pawhin mak a ti zawk,” a ti. Chutih rualin a thil tih chu a tak takah chuan taksa hrisel nana thil tha lo tak a nih thu sawiin, “Muhil lova hetiang chen chen taksa nawr luih te chu hrisel lo tak a ni. Mahse, record siam tur chuan mihring tih theih chin piah lam hreta kal a ngai miau si a,” a ti.