- Robert Romawia
Mamit district Darlak leh Tuidam inkar kawng chhia siamna atana sawrkarin cheng nuai 20 a ruahman chu, kawng chhiat tawh dan enin a tlem lutuk tih Hachhek bialtu MLA Robert Romawia Royte chuan a sawi.
Ni hnih chhunga Hachhek bial chhunga kawngpui chhe lai endika kal bialtu MLA chuan Mizoram leh Tripura inkalpawhna kawng pawimawh, Darlak to Tuidam Road chhe mek chu sawrkarin a enkawl dan chuan a tah a tihchhuah thu sawiin, kumin June thla laihawla a hmuna an tlawh lai aiin a lo chhel zual leh tawh zawk a, sawrkarin siamthat thuai tuma hma a lak tawk loh vang a ni tih a sawi.
Tunhnaia PWD minister-in Darlak to Tuidam road a tlawh chu lawmawm a tih rualin, a siamthatnana cheng nuai 20 a puang erawh khawthlang mipui mak tih a ni, tiin, nuai 500 tal sanction thuai turin sawrkar a phut tih a sawi a. He kawng hi Mizoram PWD ta leh enkawl lai anih avangin Mizoram sawrkarin mawhphurhna la a, rang taka siamtha turin an phut tih a sawi a ni.
“Hetiang kawngpui pawimawha harsatna khirh tak a thlen mek chhan hi Mizoram sawrkarin a ngaihsak loh vang leh thawmthat tuma hma a lak tawk loh vang mai a ni,” a ti.
Hachhek bial kaltlanga Tripura kalna kawng pawimawh dang, PMGSY sum hmanga Barabi to Zamuang kawng siam mekah contractor a thawh muan lutuk avangin PWD-in ‘show cause notice’ a pe hial tih Robert Romawia Royte hian a sawi a. ZPM sawrkar hnuaia State Monitoring Committee chu Bairabi to Zamuang kawng siam muan chhan enzuiin, zawng chhuak thuai se a duh tih a sawi a ni.