July 19 zan dar 11.50 vel khan Darlawn Lungverhkawnah kangmei a chhuak a, Assam type pahnih leh concrete builing pahnih a kang. Kangmei chhuak vang hian mihring thi leh hliam an awm loa, ui pakhat a kanghlum. In kangin bungrua a tihchhiat hlut zawng hi cheng nuai 91.7 hu vel nia chhut a ni.
Thudawn danin, kangmei hi Zadailova in, Assam type, a hnuai lam mi pakhat luahlai atanga intan nia hriat a ni a; a kan chhuahna in luahtu hi a riahchhuah zan a nih avangin electric current kalsual vanga chhuak nia ngaih a ni.
Mut reh tawh hun a nih avangin a kan tan lai tak hriat a ni loa, kangmei chhuah tanna nia hriat Zadailova te in, chhungkaw member pahnih awmna hi bungrua engmah chuh hman a ni loa, an thenawma Lalfamkima in, Lalremruata te chhungkua member 6 leh a hnuai lama zirlai pathum chenna pawh bungrua engmah chuh hman lohin a kang bawk.
C Thanthuama in, RCC building chu kang vek lo mah se, bungrua engemawzah a kang a, heng zingah hian an thawmhnaw zawrh lai pawh a kang a ni. An in hnuai luahtu Lallawmzuala te chhungkaw chenna pawh bungrua engemawzat a chhia a ni.
In kan chhuahna nia hriat dinglama awm, Raldingliana in chhawng thum, RCC building tho, chhungkaw member 6 luah chu bungrua chuh hman lohin a kang vek bawk.
Darlawn Lungverhkawn hi Darlawn khaw chhung lailia awm a ni a, in sak a in hnaih hlawm avangin kangmei chhuak hian a man chak hle nia sawi a ni. PHE department-in water public point atangin tui an chhuah a, mimal tui connection ami nen in kangkai zel tur hi khawtlangin dangin, zing dar 1.40 velah thelh mih a ni.
Inrinni hian kangmeiin a tihchhiat bungrua senghawiin Darlawn khawtlang huap hnatlang koh a ni.
Darlawnah in pali kang vek Nuai 91 hu bungrua kangral
