Darzo hydel project – 2400MW

Congress thalai president Laltawnliana chuan, ‘chief minister Lalduhoma’n Darzo-ah power megawatt 2400 siamchhuahna tur an din tur thu a sawi chu thil lawmawm tak angin lang mah se, he power project buatsaihnaah hian central-a BJP sawrkarin Mizoram sawrkar a rawn miah lo, contractor thlengin a tifel vek tawh…’ tiin tun hnai khan a sawi a.
MNF general secretary Er K Lalsawmvela chuan, Darzo lui tê tui khuaha MW 2400 pe chhuak thei siam chu tihpuitlin theiha a ngaih loh thu tunhnai khan a sawi a. ‘Mizoram lui Tuirial tuikhuah, tui tling tam lutuk pawh installed capacity chu MW 60 chauh niin, Mizorama lui lian ber Chhimtuipui pawh installed capacity chu MW 460 vel awrh pechhuak thei tura chhut a ni a, thal laia tlem tê luang Darzo lui tui pump chhoh hmanga MW 2400 siam theih tura sawi chu a rintlak loh…’ tiin a sawi thung a ni.
Kawlphetha chakna Megawatt 2400 pe chhuak thei tura sawi Darzo hydel project chungchangah hian Congress lam chuan he project thawktu tur contractor thlenga tihfel vek a nih tawh thu an tarlang a, chutih laiin he Darzo hydel project atana survey lo neih tawh dan te, a project cost te, siam hun chhung tur te hi mipui lam chuan eng mah a detail kan la hre ve lo niin a lang a, contractor thlenga tihfel a nih tawh chuan hmalakna a kal thui tawh hle tihna a ni a, he hydel project hi a ruka kalpui tum deuh te hi a lo ni tehreng em maw ni dawn ni!
India rama hydel project lian bera sawi MW 2000 pe chhuak thei Subansiri Lower Project (Arunachal/Assam) hi tun thla tir lam khan commissioned a ni a, kum 23 zet buaipui (leiminin a tihbuai vangin a khawtlai deuh) niin, a project cost pawh cheng vbch 26,000 a ni.
Subansiri lui hi Brahmaputra lui fintu lui lian ve tak, Brahmaputra lui tui 7.9% vel thawhtu a ni a. Darzo lui leh Subansiri lui han khaikhin hian, Sai leh zawhte ang vel an nih a rinawm. Darzo lui hian Subansiri lui tuiin a pekchhuah kawlphetha (MW 2000) aia tam MW 2400 a pechhuak thei ve thung dawn a nih chuan, thiamna sâng tak (advanced technology) rawih a ngai dawn tihna a ni awm e.
Eng pawh ni se, electricity power hnianghnar tak neih hi chu kan mamawh e, chutih rualin, tun atanga hma lam hun thui tak kan thlir tel zel a pawimawh. Kan ram zimte chanve hmawk mai hi tui hnuaia kan dah mai chuan, kum 100 leh a hnu lama Chhuan lo awm zel turte chenna tur leilung hi a chep lutuk palh ang e.