David Beckham-a’n a hming bulah ‘Sir’ a dah thei ta
November ni 4 khan footballer chawl tawh, a vanglaia football khawvela huhang nei lian ber te zinga mi David Beckham chuan King Charles III hnen atangin Knighthood a dawng a, tunah chuan a hming bulah ‘Sir’ tih a dah thei ta. He title a dawnnaah hian a nupui Victoria Beckham pawhin a tawiawm.
Football lama England tana captain pawh lo ni tawh, David Beckham pawh kum 50 mi a ni ve tawh a, knighthood a dawnna chhanna hi sports lama a thawh hlawk avang leh charity lama a thilphalna avanga dawng niin an tarlang.
Windsor Castle-a title hlanna ceremony an hman zawh hnuah David chuan, “Ka dawng dawn tih ka hriat tirh khan lawm avangin ka tap a, a hnu thla hnih khat chhung pawh khan a la ni ang. Mahse, tunkar zet chuan rilru a den dan a dang khawp mai, London-ah kir lehin, vawiin thleng hian, rilru hahna lam chu ni lo mah se ka zâm ve viau a ni. Ka thinlung a khawih a ni ber mai e,” a ti.
A title dawnnaah hian a nupui Victoria bakah a nu leh pa Ted leh Sandra pawhin an tawiawm a, a nu leh pa bakah Victoria nena an fate- Brooklyn, 29, Romeo, 23, Cruz, 20, leh Harper, 14, ten ‘Sir’ an tih a ngai a tawh dawn tiin fiamthu a thawh zauh bawk a, “Ti ngei ngei turin ka phut lui lo ang. Mahse, an duh chuan Sir Dad tih emaw Sir Son ti emaw te pawhin min ko thei ang chu. A khai a, ka’n uang ve lawk a nih kha, miten hetianga min koh chuan awmdan kan thiam ve rih lo ang,” a ti.
Hetia a pasalin a hming bula ‘Sir’ title a dah theih takah chuan Victoria pawh tunah chuan Lady Beckham a tih ve theih dawn ta bawk a ni.
David Beckham hian Manchester United, Real Madrid, LA Galaxy, AC Milan leh Paris Saint-Germain-ah te pawh a lo khel kual ve zak zak tawh a, 2013 atang khan ball pet a chawlhsan ta a, football khawvela a thawhhlawk avangin 2003 khan Queen Elizabeth II hnen atangin chawimawina OBE (Officer of the Order of the British Empire) a lo dawng tawh bawk a ni.
David Beckham-a’n a hming bulah ‘Sir’ a dah thei ta
