David Rush-a’n ni 1-ah record 15 siam
A khat tawka Guinness World Record siam deuh reng thin David Rush chuan record a siam leh ta a, tun tum chu record pakhat mai ni lovin, nikhatah record 15 a siam hman a, Rush hian tum khata record title kawl hnem ber nih a tumna pawh a puitlin tawh bawk.
Rush hian minute khatah apple pum thum juggling-in (apple pum 3 a kut pahnih hmangin a vawr kual a, engtik lai pawhin apple pakhat tal chu boruakah a awm reng tur a ni), hetia juggling ti reng chung hian a apple vawrh lai chu vawi 198 a keih (bite) hman a, record a siam.
A record dang leh chu bottle chhin pahnih a table tennis ball vawi sawm vawm sawt rang thei ber niin, second 2.09 chhungin a ti hman. Hei bakah hian second 30 chhunga ka (mouth) hmanga banga table tennis ball tisawt hnem ber niin, ball 47 a tisawt man a, minute khatah banga table tennis ball vaw sawt hnem ber niin, vawi 398 a vaw sawt hman a, second 30 chhunga banga TT ball vawma a rawn sawt let leh lu (head)-a saving foam (sahbawn phuan ti mai ila) hmanga lo dawng hnem record siamin, 16 a dawng hman bawk.
Heng bakah hian lehkha hmanga thlawhtheihna lem siama thlawh rang thei ber record siamin, second 5.12 chhungin a tihman a, minute khat chhunga chopstick hmanga target vawm fuh hnem ber record siamin 29 a vawm fuh hman a, second 30 chhungin T-shirt hak thuah hnem ber record siamin, 20 a ha hman a, kut pakhat chauh manga toilet paper rool 10 chher chhuan hnem ber record siamin second 5.38 chhungin a tizo hman a, kutphah chauh hmanga second 30 chhunga tui chhung hnem ber record siamin, 5,100 ml a chhung man a, straw hmanga ser tui litre khat in zo rang ber niin, second 13.99 chhungin a inzo hman bawk.
Heng bakah hian baseball kutphah leh kut hnunga second 30 chhunga tawk hnem hman ber niin, vawi 125 a tawk hman a, hnung zawnga banga basketball second 30 chhunga pass hnem ber niin, vawi 38 a pass hman a, balance board a ding chunga minute khat chhunga bowling ball leh ball dang pahnih juggling hnem hman ber niin vawi 243 a juggling hman bawk.
David Rush-a’n ni 1-ah record 15 siam
