Lengteng bial chhung ami Pawlrang khua in dawnfawh an thar, Mawmrang Farmer Producer Company (FPC) in a hralhsakna hmun Aizawl Chanmari-a ami chu Inrinni khan Agriculture minister C Lalrinsanga chuan a tlawh a. Lengteng bialtu MLA, Human Resources Development Board vice chairman Dr L Thangmawia’n a tawiawm.
Minister hi Mawmrang FPC leh Clover Organic Pvt. Ltd. hotuten an lo dawngsawng a. Mawmrang FPC hotute chuan Lengteng bial kuthnathawktuten an dawnfawh thar hralh kawngah harsatna an tawk tih hria in, a hralhna lamah an puih thin thu leh a tui (juice) siamchhuah saka an tihral pui mek thu an lo hrilh.
Lengteng bialin hlawhtling taka dawnfawh an tharchhuak chu lawmawm a tih thu minister hian a sawi a. Lengteng bialtu MLA Dr L Thangmawia chuan a bialah kuthnathawktu taima tak tak an tam thu leh dawnfawh hi kumin hian a bialchhung – Ngopa, Lamzawl, Chiahpui leh Pawlrang khua ten hlawhtling taka tam tham tak an thar thu a sawi a. A hralhna lama tlawmngaih chhuahpuitu Mawmrang FPC leh Clover Organic Pvt. Ltd. chungah a bial mipui aiawhin lawmthu a hrilh.
Dawnfawh thar leh hralh dan minister-in enpui
