Lallunghnema
Charity Lodge
Cont: 9862288182
Chhiartute chibai tha ber ka bûk a che u.
Vawiin chu Consumer WhatsApp group member pakhat thil tawn hi ka rawn chhawp chhuak dawn a ni. Ngun takin lo chhiar teh u. Ka thutluknaah chuan Consumer fel leh Dawrkai fel an intawng a ni ber e. Anni pahnih hi an entawntlak hle a. An nunkhua pawh a nuam ngawtin ka ring. He Consumer khawvel hi a takin an chên niin ka hre hial a ni.
Tichuan, Kohhran Upa pakhat chuan, Bazara a thil tawn chanchin heti hian a post a:
VAWIINA KA THIL TAWN :
Date 15.05.2025 khan kan Istiri (puan /thawmhnaw) nawhna a chhiat avangin, kan nu nên Bazar-ah lei tur zawngin kan pahnihin Istiri (thawmhnaw nawhna) lei turin kan inzui chhuak ta a. Bazar, BAJAJ ELECTRONICAL LTD Inspiring Trust dawr a ni. BAJAJ METALLIGUE BLUE tê fel ren râwn, zangkhai tha tak mai kan lei ta a. Cash Memo leh Warranty Card min pe thlap a. Tichuan, kan nu nen chuan, Sabji Bazarah kan chhuk leh a, chawhmeh tlêm kan lei a, Mualpui Line Bus-ah kan hâwng ta a. Kan Istiri lei chu kan han hmang a, tha kan ti hle mai a, kan lungawi hlein ka hria. Chutia lungawi taka kan hman lai chuan, nimin piah chawlhni (13 July, 25) khan kan nuin thawmhnaw hâk tur a nâwt a, a nawh zawh chuan a’n pawt phawi a; plug-a zuk vih luhna pin pakhat chu a chhe ta tlat mai a. Thawmhnaw nawhna kan nei leh ta lova. Engtin nge kan tih ang kan ti a. Kan nuin, “Electric thiam (Electrician) ko ila a siam a har lo ang a ti a”. Mahse, kei chuan Electric thil a ni a, fimkhur a ngai, midang khawihtir lovang, kan leina dawrah ka va entir ang a, a tih dan an hre/ thiam êm êm ang, fimkhur a tha, ka ti a. Kan leina dawr, BAJAJ ELECTRONICAL LTD Bazar-ah chuan ka va kal a. Thil awmzia ka han sawi chuan, dawr nghaktu chu a lo fel khawp mai a “Ka pu, khawi teh, kan lo en teh ang,” a ti a. Ka pe a, a han en a. “E, a nih hi, E, a nih tak hi”, a ti a. A drawer chu a han pawt hawng a, a hai ri rawk rawk a, a plug pin chhia chu a hma ami aia thain min siamsak ta a. “Ti kha chuan a chhe tawh lovang, in thlauh etc, a nih loh chuan, a chhiat hmâ chu a daih tawh ang” a ti a; kan nui bâwk bâwk a. Tichuan, “Eng zat nge ka pek ang che,” ka ti a. Dawr nghaktu fel tak mai chuan, “Ka pu, a man pek a ngai lo, kan dawr atangin thil leitute’n an thil lei hi an lei chhan ang tak a tangkai leh thaa an hman hi alawm kan duh ber,” fiamthu ti tak deuhin a tî a. Pawisa a la duh awzâwng lo mai. “Hei Warranty pawh a awm vek hi”, a ti a. Thil tê tham tê ni mah se, ka lawm êm mai a, kan Group-ah hian member zawng zawngte hi BAJAJ ELECTRONICAL LTD Inspiring Trust, Bara Bazar Aizawl ang veka Consumer-te right ngai pawimawh leh care-tute vek hi ni se, kan ram/State hi a va nuam dawn em! ka ti a. Group member-te hi kan han hriattir ve che u a ni e. Kan member, electric bungrua leh materia mamawhte chuan anni hi lo dawr ve thin turin ka hriattir che u, a ni e.
Heta tanga kan hriat leh tur chu:
1) Dawr nghaktu hi a rinawmin a fel.
2) Consumer hi a huaisenna turah a huaisen.
3)Consumer hian Cash memo leh Warranty Card a la a, thil a felna a ni.
4) Consumer hian a nachang a hria.
5) Dawr nghaktu nu hi Kristian dik tak a ni.
6) Dawr nghaktu hi a entawntlâk hle.
Message pakhat chhinchhiah tlak tak mai tawi fel tak hi lo chhiar teh. “Best choice hi kan zuar a, an ziak danah chuan 750 gram MRP cheng 150 tih a inziak a, chu chu cheng 140-in kan hralh”, leh tlat mai a. Dawrkai tha a ni chiang hle mai.
Hei pawh, “MRP aia hniama hralh theih a nih hi kan hre lo hrim hrimah dawrkai tam ber hian min ngai â a ni. Damdawi hi ka ei tur ka chah thin a. Tlêp ti mai ang (strip) tinah discount kha an paih hnuin a man zat min rawn hrilh (in-voice-in) a, kan thawn thin. A printed price-in hetah chuan min pe zel (Mizoram ) Mizoram hi kan la piang fuh lo a ni rih e”.
Hei hi lo chhiar leh la.
“Vawiin khan Arunachal Bunderdema khaw Gate bulah Mobile Fast Charger (ori.) leh Phone thar ka lei a. MRP aia thlâwm daihin min pe a. Mizoram nên ka tehkhin a, Dawrkai Hindu hote hi Kristian-te aiin an rinawm zâwk niin ka hmu! Inzir nan hman ve te tum ila, a lawmawm khawp ang. Mizorama ringtute pawh hian vai hnam pui (hnam hmasawn leh changkang zawk a sawina a ni ang-llh) dawrkaite hi entawn ve zel rawh se”.
Hei hian ka thu leh hla ka han titawp ang e.
Consumer hi kan nih vek avangin kan Dikna leh Chanvo hi ngaihnêp theih a ni lova. Huam zau ber, huap zau ber a ni. Kan ni tin khawsak rêlnaah hian engkimah a pawimawh ber a ni.
Ram changkang apiangah consumer-te an zalen a, ram hmasawn lo leh changkang lo ram apiangah consumer-te an chêp thin. Mizoram hi eng dinhmunah nge kan din ve ang le?