Dawrpui Veng huamchin sawinaah sawrkarin kum 1994-a gazette a lo siam tawh chu an tan chhan a ni a, chumi pawm ve lo chu anmahni nena buaina ni tawh loin, a pawm lo tu leh sawrkar inkar a ni tawh zawkah an ngai tih Dawrpui Veng khawtlang hruaitute chuan an sawi.
Dawrpui Khawtlang Hruaitute Joint Committee chuan thuthar thehdarhtute an kawm a. Chhinga Veng nen an ramri chungchangah tharum ni loin, dan hmanga hma an lak zel tur thu sawiin, sawrkarin an veng huamchin gazette a chhuahah inchi khat pawh an tawlh dawn lo tih an sawi.
Chhinga Veng-in buaina an siamna lai chu Dawrpui area a ni a. Sawrkarin khua leh veng ramri a siam, Dawrpui ramri tarlanna Gazette Vol XXIII Aizawl Friday 29.04.1994-ah Dawrpui area a ni tih chiang takin a lang a. Chhinga Veng ramri tarlanna Gazette Vol X Aizawl Friday, 22.1.1982-ah pawh helai hmun hi Chhinga Veng area a ni lo tih chiang takin a lang bawk tih an sawi.
Kumin June 16 zinga Dawrpui Veng chhunga ‘Chhinga Veng Thalai Pawl’ intiten Dawrpui mipui zahpah loaposter an tar khum leh, aurinna hmanga veng mipui an rawn cho mai chu mak an ti hle a. Dawrpui area-a dawr an kalh sak ngam phei chu dan bawhchhiatna dik tak niah an ngai tih an sawi.
Hemi nia an ward corporator-in veng pahnih local council a sawipui tum leh, Aizawl DC kaihhruaia an sawihonaah pawh Chhinga Veng khawtlang hruaitute chuan, ‘Chhinga Veng Thalai Pawl’ hmalakna an hriatpui loh thu an sawi laiin, a hnu lawkah an khawtlang Joint Committee chuan he pawl hmalakna hi an thlawp tih an chhuah leh si niin an sawi a ni.
June 17-a Aizawl mayor hoa veng pahnih hruaitute inkawmhonaah pawh Dawrpui Veng aiawha telte chuan, heti taka an laka an chet dan rawva lutuk hian an rilru a ti na hle chungin, dan hnuaiah veng pahnih hi inrem dan kawng zawn tha an tih laiin, Chhinga Veng aiawha telte chuan ‘gazette an pawm lo’ thu an la sawi lehzel phei chu sawrkar thuchhuak zah lohnaah an ngai a, buai chhunzawm zel an pawi ti loah an ngai tih a sawi bawk.
Dawrpui Thlanmual (pass DLL-62 of 1990) Centenary signboard lak thlak chungchangah, he thlanmual hi veng 6 – Dawrpui, Saron Veng, Tuithiang, Armed Veng, Armed Veng South leh Chhinga Veng ten an din ho, ‘Dawrpui Thlanmual Committee’ enkawlna hnuaia awm, a hming ‘Dawrpui Thlanmual’ tih pawh he Committee-in lungrual taka an pawm a ni tih Dawrpui Khawtlang Hruaitute Joint Committee hian an sawi a. Ram hruaituten inremna beiseia an ngenna avang chauha an insum hram hram lai a, Chhinga Veng lamin an thil tih chhiat siamtha a, signboard an tar lak thlak an tum tak loah chuan inrem an duh loah an ngai a, a tul angin dan angin hma an la zel dawn tih an sawi a ni.
Dawrpui-in sawrkar gazette tanchhan
