Kar kalta khan chief minister leh social welfate minister chuan Mizorama ruihhlo ngaite enkawlna chungchang an sawi dun a. Mizorama ruihhlo ngai enkawlna Integrated Rehabilitation Center for Addicts (IRCAs) 11 te tihlenna tur te, hetiang center la awm lohna district pangaa din vena tura Ministry of Tribal Affairs-a funding an zawn mek thu te, Thingsulthliaha Multi-Disciplinary Treatment & Training Center din tur chungchang leh Jordan Center kalpui dan tur te, after-care skill development chungchangte an sawi dun a. Private leh kohhran enkawl de-addiction centre-te pawhin skill development program an kalpui theih dawn chuan sawrkarin grant in aid a pek tur thute pawh sawi lan a ni bawk a.
Ministry of Social Justice and Empowerment hnuaia National Action Plan for Drug Demand Reduction (NAPDDR)-in a tarlan dan chuan, IRCAs 11 bakah hian Mizoram sawrkar enkawlna hnuaiah Outreach and Drop In Centres (ODICs) 2 leh, Addiction Treatment Facilities (ATF) pakhat a awm mek bawk a. IRCAs ang hi district dang panga heng Saitual, Khawzawl, Hnahthial, Lawngtlai leh Mamit-ah te hian dah belh a nih dawn chuan Mizoram sawrkar hnuaia de-addiction centre ang chi hi 18 zet a awm dawn tihna a ni; private (pawl) leh kohhran enkawlte nen chuan Mizoramah hian ruihhlo ngaite enkawlna/buaipuina hmunpui hi a thahnem tham dawn hle tih a hriat a ni.
Heta tanga thil pakhat lo lang chiang em em ta chu, ruihhlo ngaite enkawl tur a tlakhniam tak avanga Centre khar ngai a awm lo hi a ni. Chuta chhapah, IRCAs dang panga hawn belh tura hma lak sauh sauh a ni zawk.
|henawm state Manipur a buai avanga drug cartel ten Mizoram an rawn paltlang tak avanga tun hnai kum hnih khat chhunga ruihhlo man chhuah a let tam taka a pun thur thur avang hian Mizoramah ruihhlo ngai hi an pun chak phah em em a ni hran chuang lo a. Ruihhlo hi chu khawchhak atangin a lo lut reng a, tualchhunga vir vel tawk hi chu kum tam tak liam ta atang khan chatlak lovin a awm reng a. Ruihhlo thihpui an awm reng a, ruihhlo ngai thar an awm belh zel bawk a. Ruihhlo ngai zingah hian kum tling lo an pung chho zel tih report te pawh a awm a ni.
Ruihhlo (narcotics & alcohol) ngaite enkawlna hi chu kan buaipui reng tawh dawn, chutih ruala a aia nasa zawka kan buaipui tur nia lang ta chu, tuna ruihhlo laka la fihlim mekte hi ruihhlo bawiha an luh ve loh nana theihtawp chhuah hi a ni. Chutianga ngawrh taka hma kan lak theih phawt chuan, tun atanga thangkhat lian a han ral leh meuh hi chuan, De-Addict Centre thenkhat hi chu khar a ngaih chiah loh pawhin, an thawl hawk thei ngeiin a rinawm.
De-Addict Centres leh Mizoram
