Traffic jam-in Aizawl khawpui a tibuai a, kum
dang ang bawkin December-ah a zual leh. Tun karah a nasa zual a, tun karah ni tinin traffic a tawt thei hle.
Traffic Police te chuan tun hnaiah Aizawlah traffic a jam nasat thu an sawi a, December-ah hian a zual thin ve reng tih te, Krismas dawnah kum dangah pawh a zual thin tih te an sawi.
December kher lovah pawh Aizawla traffic a jam thin hi, lirthei a pun chak vang a nih thu an sawi a, thla tinin lirthei a pung a, kawng a pung ve si lo a, kawngpuiin a zo lo an ti. Tun hnaiah pawh, kumin kum chawhnu lamah ringawt pawh lirthei hi a pung nasa tih an sawi.
December-ah Aizawlah khualzin an pun thin thu an sawi a, Zoram hmun hrang hrang atangin Aizawla bazar an pun bakah, khaw dang atanga Aizawla lehkhazir, mahni khuaa la haw lote an bazar hun a ni bawk a, Aizawl mite an bazar bawk a, Krismas bazar vangin tun ang hunah hian Aizawlah veivak an pung thin an ti a, chu chu December-a traffic jam thin chhan ber pakhat a nih thu an sawi.
Tunlaiin Lammualah Winter Festival an nei mek a, sipaiin Lammual hung chhunga lirthei tlan luh an phal si lo a, heta inzuar turte’n an bungruate Lammual pawnah rem lo chung chunga an hlan thlak a ngai a, chu chuan lirthei tlan vel a nghawng tih an sawi bawk.
Tun hnaiah sorkar thar lakluh a nih thu leh MLA-te lakluh an nih thu an sawi a, Session-in a zui a, heng vang hian lirthei tlan dan tihdanglam te a ngai a, hei hian lirthei tlan vel a nghawng tih an sawi.
Traffic Police te chuan chhun zan zawma an duty thu an sawi a, zan rei thlenga an duty thu sawiin, mipuiin dan ngai pawimawh se an duh thu leh chu chu mipuite himna tur a nih thu an sawi a, driving license nei lote’n lirthei khalh lo se an duh thu, hei hi mipui him nana thil tul a nih thu an sawi.
Dec-ah Aizawlah traffic jam nasa leh
