Boxing-ah palian huanga boxer tha filawr pahnih Oleksandr Usyk leh Tyson Fury te an inhnek nawn leh dawn a, an inhnek nawn leh hun tur atan December 2024 ruahman niin, an inhnekna hmun atan Saudi Arabia bawk thlan a ni.
Oleksandr Usyk leh Tyson Fury te hi May 18, 2024 khan palian huanga kawnghren pali kawl khawm hmasa bertu ni an inchuh a, Riyadh ah inhnek hmuhnawm tak an lo lantir tawh. He inhnek hmuhnawm takah hian kawnghren pathum kawl mektu leh pumraw te zawk ni bawk Usyk chuan split decision hmangin hnehna a chang a, palian huangah kawnghren pali kawl khawm hmasa ber a ni. Palian huangah kawnghren pali; WBC, WBA, WBO leh IBF kawl khawm hmasa ber Usyk hi Tyson Fury hneh thei hmasa ber a ni bawk.
Tyson Fury leh Usyk te hian kawnghren pali an inchuh hmain inhnek nawn leh turin inremna an lo nei lawk tawh. Inhnek nawn leh tura inremna an lo neih lawk tawh angin an inhnek hun atan December ruat a ni. A tirah chuan an inhnek nawn leh hun atan October thla ruat a ni hman zet naa December thlaah sawn hlat a ni ta zawk.
Usyk leh Sury te hian an inhnek nawn leh hunah hian kawnghren pali an inchuh tawh dawn lo niin a lang thung. IBF belt kawl mektu Usyk hian IBF kawnghren chuhpuitu tur hmachhawn lovin Fury hmachhaw nawn leh a thlang a, hei vang hian a kawnghren kawl pakhat IBF hi hlihsak a ni dawn a. Filip Hrgovic leh Daniel Dubois te chu tunkar inrinni zan hian an inhnek dawn a. He inhneka chak zawk zawk hian Anthony Joshua an hmachhawn ang a, IBF belt inchuh zui tura ruahman a ni. Joshua hian IBF belt a lak a, Fury-a’n Usyk a lo hneh hlauh a nih bawk chuan British boxer lar pahnih Joshua leh Fury te hian kum 2025-ah kawnghren pali an inchuh zui tura ngaih a ni.
December thlaa an inhnek nawn leh hunah Usyk hian Tyson Fury hneh nawn leh ngei a tum dawn a, a lawn tawhna kungah lawn nawn leh ngei a tum dawn. Hetihlai hian Fury hian a tlawmna leh a lo mualpho tawhna chhangletiin Usyk hi hneh ngei a tum tawh dawn a, inbuatsaih na tha tak nen inhnek hmuhnawm zawk an chhawpchhuak ngei tura ngaih a ni.
December-ah Usyk vs Fury 2
![](https://theaizawlpost.org/wp-content/uploads/Clipboard01-1166.jpg)