Delhi Education Minister Atishi chuan Inrinni kalta khan Delhi-a primary school te chu November ni 10 thleng chawlh a nih tur thu a puang a, Delhi khawpui boruak chhe lutuk-in ziaawm lam a pan theih loh vanga chawlh hi puan a ni. Class 6-12 te chu online hmanga class kal an duh zawk leh zawk loh a thu niin an sawi bawk. He chawlh puan a nih chhan hi Delhi khawpui boruak chhia-in “Severe plus” dinhmuna a awm reng vang a niin heng boruak chhiate hi zan lama thli thaw-in Delhi khawpui chungah a zawnin ni ruk chhung hri hlauhawm tak tak a rawn ken luh vang a ni, tiin PTI chuan a sawi a ni.
Zirtawpni kalta khan Delhi Chief Minister Arvind Kejriwal chuan pollution levels sang lutuk ‘severe’ dinhmun ah Delhi chu a awm avangin sorkar leh private enkawlna hnuaia primary schools te tan chawlh a lo puang tawh a. Delhi-a boruak air quality index chu chhiat belh zelin Inrinni tlai lam dar 4-a 415 chu Pathianni zing dar 7-ah chuan 460 a kai chho daih a ni. Central air pollution control plan chuan rikrum thil a awm a nih chuan boruak tichhe thei trucks te, sumdawnna atana hman lirthei ke-li nei chi te leh hnathawh kal lai mek te chu tihtawp tur niin hei hi Delhi khawpui-a AQI-in 450 a pelh chhoh huna hman tur a ni ang.
Kar kalta atang khan Delhi khawpui boruak hi a chhe hret hreta, zawi zawia temparature lo hniam te, zawite tea thli thaw ten hri an keng leh Punjab leh Haryana-a buh phal hal ten boruak chhia a rawn ken vang niin an sawi. Central Pollution Control Board-in data a tihchhuah danin Delhi air quality chu October 27 leh November ni 3 inkarah 200 points-in a pung a, hei hi san belh lehin tun dinhmuna a san lai ber ‘sever plus’ (450 chunglam) chu Zirtawpni khan a thleng chho a ni. Kum 2021 November ni 12-a AQI record dinglai 471 atanga vawiin ni thleng hian Zirtawpni kalta a chawhruala 468 chu a chhiatlai ber a la ni rih a ni. Delhi thenawm Ghaziabad chu 410 a ni a, Gurugram chu 441, Noida 436, Greater Noida 467 leh Faridabad 461 te niin dinhmun hlauhawm takah an ding a ni.
Delhi-ah oruak bawlhhlawh vangin sikul chawl
