Delhi bomb puaka car inziah luhna hming putu man

Delhi bomb puaka car inziah luhna hming putu man
Kar hmasaa Delhi-a car bomb puaka mi pariat thihna leh mi 20 hliam tawhna kaihhnawihah India chuan mi pakhat a man belh tih thuneituten Pathianni khan an sawi.
National Investigation Agency (NIA) chuan ‘firfiakte chetna’ tia an sawi an chhuinaa an mi man thar hi car puak ta kha a hmingin sorkarah ziah luh a ni tih an sawi.
Thihchilha a bomb phurh tipuaktu nen khan ruahmanna an siam dun niin an ngai a. An mi man hi Indian awp chin Kashmir-a cheng niin thuneitute hian an sawi bawk.
Bomb kha Delhi-a hmun langsar ber zinga mi, Red Fort bula metro station bul maiah a ni.
Agency hian lirthei dang pakhat, thihchilhtuin a hmaa a tihpuahna tur hmun vel thlithlai nana a hman pawh an man tawh tih an sawi a. Thu hretu mi 73 an kawm tawh a, an zingah hian kha thil thlenga hliam tuarte pawh an tel.
Kulh hriat hlawh leh hmun pawimawh tak tuala hetiang thil a thlen hi venhimna khauh tak awmna khawpuia kum 2011-a bomb tihpuah leh hmasak ber a ni.
Kar kal ta Thawhtanni tlai 06:52-ah, a lun vanglai tak, lirthei kalte pawh muangchanga an tawlh lai, traffic signal-in lirtheite a tihdin lai chiahin a puak a ni.
Darkar rei lo te hnuah Union Home Minister Amit Shah chuan bomb puak kha Hyundai i20 car vara tihpuah a nih thu a puang zui nghal.
Video leh thlalak thehdarhah chuan car var ruangruh chhe tawh tak leh lirthei dang kang chhe tak tak te, autorickshaw leh cycle rickshaw chhe nasa takte pawh hmuh tur a awm.
Prime Minister Narendra Modi-a chuan he thil thleng hi ‘inphiarna’ tia sawiin a sorkar chuan ‘a bultumtu, an thawhpui leh lo thlawptu zawng zawngte’ hai chhuaha hremna pek an nih tur thu a sawi.
Eptu hruaitu, Rahul Gandhi-a pawhin a thil hriat chuan ‘a thinlung a tina tak zet’ tih a sawi ve bawk.
Police chuan Ningani khan Kashmir-a police-in mipa pasarih an mante pawh Delhi-a thil thleng nen hian inkungkaihna an nei hlawm em tih uluk taka an chhuia an zawh fiah zel thu an sawi.
Delhi daia tun hnaia puak thei kg 2,900 man chhuah nen pawh inkungkaihna nei thei a awm palh ringin an chhui zui mek bawk tih police hian an sawi.
Red Fort hi khualzin sang telin ni tin an tlawh thin a ni a, kum zabi 17-naa sak tawh kha a ni a. Indian prime minister-ten Mughal kulh ropui tak hi Independence Day lawmna thuchah sawina hmun atan an hmang thin bawk.