Delhi boruak bawlhhlawh Covid-19 aiin a hlauhawm thei
Delhi-a boruak chu hip luh atana hlauhawm tak dinhmunah a chho leh ta a, mi thiamte chuan he boruak bawlhhlawh tak hi vantlang hriselna atan Covid-19 hripui ai pawha hlauhawm a ni thei tih an sawi.
Nilaini khan boruak bawlhhlawh lam chu World Health Organization (WHO)-in a him chin a tih let 35 zeta bawlhhlawh a ni a, mi cheng tam tak chuan thawk lamah harsatna an neih thu leh an mit leh hrawk a thip tih an sawi bawk.
Thuneitute chuan vantlang, a bikin naupang leh upa deuhte chu a theih anga tam ina awm turin an ti a, pawna chhuakte pawhin doctor-ten a him an tih hmanga hmai tuam turin an ngen.
Hetih lai hian air technology company IQAir-a Global Chief Executive Frank Hammes chuan hei hi chu hun reilo te atana invenna mai a ni a, rei daih tur himna tur ngaihtuah a ngai tih a sawi.
‘Boruak bawlhhlawh dan em em hi vantlang tan hripui ang a ni,’ tiin BBC a hrilh a. Boruak bawlhhlawhin thihna thlenga a thlen theih thu a sawi. ‘Vantlang hriselna a nghawng dan hi Covid-19 ai pawhin a nasa thei,’ a ti.
Delhi leh a chhehvel state-ah hian kum tin thlasik lai hian thli thaw muang, lirthei khu leh thlai sengna ro leh mei tuah nasat avangin boruak bawlhhlawh tak an tawng ziah thin.
Swiss air quality index, IQAir chuan Nilaini tukah khan Delhi hmun thenkhat chu 550 chung lam a ni a, hlauhawm tak huang an tih, 300 aia sang fe a ni. Nilainiah vek khan London-ah chuan 26 chauh a ni.
Air Quality Index (AQI) an tih hi boruaka bawlhhlawh nawi tete, PM 2.5 an tih awm zat atanga chhut thin a ni a. Hammes-a chuan hetiang bawlhhlawh hi tibawlhhlawhti hlauhawm ber tiin a sawi a, boruak bawlhhlawh dan tehnaa a awmchhun niin a sawi bawk.
‘Thawk harsa, thawhah, lung leh chuapa harsatna a thlen thei a, miin hmanhmawh taka damdawi in an pan phah a ngai thin,’ a ti.
Delhi sorkar chuan Thawhlehni khan boruak tibawlhhlawh thei khuahkhirhna na zawk a kalpui tan a, hei hi court sang berin chawlhkar hnih pawh la liam lova hlip tura a tih kha a ni.
He inkhuahkhirhna, Graded Response Action Plan (Grap) Stage 4 hnuaiah hian sikul tam zawk chu ral atanga zirtir tur a ni a, in sak leh thiah zawng zawng tihkhap a ni a, lirthei lian chi zawng zawngte pawh ni tin mamawh phur an nih loh chuan khawpuia tlan khap a ni bawk.
Mi cheng pakhat, Manish Adhikari chuan hetiang renga thlasika boruak bawlhhlawh dan a san zel chuan Delhi-ah hian dam khawchhuah ngaihna a awm loh mai a hlauhthawn thu news agency ANI a hrilh.
Bhagat Singh pawhin, ‘Boruak bawlhhlawh hi Delhi bikah chuan tihdam theih loh natna a ni ta a, a danna a awm lo,’ a ti.
Delhi boruak bawlhhlawh Covid-19 aiin a hlauhawm thei
