Nimin khan Delhi chief minister ni lai Arvind Kejriwal chuan Lt. Governor VK Saxena chenna Raj Niwas ah CM atanga a banna a thehlut.
Aam Aadmi Party (AAP) leader Gopal Rai chuan thuthar thehdarhtute hnena a sawi danin, Arvind Kejriwal a banna thehlut hi Delhi a local government chuan kan hriatpui thlap a ni a, party MLA zawng zawngte pawhin an hriatthiam sa thlap a ni. Tin, CM thar pawh kan nei thei thuaiin kan ring a, Atishi chu kan CM thar a nih ngei kan ring bawk a ni, a ti.
CM thar tura rinkai Atishi hi politics lama hnuhma tha tak lo nei tawh niin, hun hmasa lamah pawh legislative party leader te a lo ni tawh a ni.
Atishi hi kum 45 mi niin, Delhi CM hmeichhe pathumna a ni dawn a, hun hmasa lamah Delhi hian Sushma Swaraj leh Sheila Dikshit te chu hmeichhe CM atan an lo nei tawh bawk a ni.
Kum 2020 a Delhi MLA thlan khan Atishi hi Kalkaji constituency, South Delhi-ah dingin a khingpui BJP candidate Dharambir chu vote 11,422 in a hneh a. A tirah Cabinet Minister a lakluh ni lo mahse Education changtu Dy. Chief Minisret Manish Sisodia Advisor a ni. Deputy Chief Minister Manish Sisodia leh Health Minister Satyender Jain-te man an nih a, Minister atanga an ban hnu khan kum 2023 March ni 9-ah Cabinet Minister-ah lakluh a ni ve ta a. Delhi Minister zinga Portfolio ngah ber niin Department 14 a enkawl mek a. Chung zingah chuan Finance, PWD, Education Power, Revenue, Water Department-te a tel.
Delhi CM Kejriwal-a’n banna a thehlut
