Mizorama ran chaw siamna hmunpui ber Animal Feed Plant Ramrikawn chuan Mizorama ran vulhtuten ran chaw an mamawh zat atanga zaa 10 vel a siam chhuak a, hei hi demand a tlem vang niin Feed Plant enkawltu, senior veterinary officer Dr Vanlalzarzova chuan a sawi.Hetih lai hian, phai atanga lakluh ran chaw erawh ran vulhtuten a ba-in an la nasa hle a, dawr pakhatah ringawt pawh ran chaw man lak batna cheng nuai 200 vel a tlingkhawm thei thin niin thudawnna chuan a sawi.
Mizoram atanga siam chhuah ran chaw hi state pawn atanga chawk luh ran chaw quality ang thlapa siam chhuah niin, a man pawh a tlawm zawk a; mahse Feed Plant hian a ba-a a pek chhuah ve theih loh avangin ran vulhtute atangin demand a lut tam ngai lo tih sawi a ni.
Animal Feed Plant hi revolving fund hmanga enkawl a ni a. Kum 2002-a din a nih khan, project cost atanga cheng nuai 30 chu revolving fund atana hman niin, chumi hmang chuan amah leh amah a inenkawl. Khawl hian darkar khat chhungin ran chaw metric ton 8 siam chhuak thei mah se, ni khat (darkar 24) chhungin ton 8-10 vel bak siam tur a awm ngai lo a; chuti chung chuan a thawh chhuah atangin revolving fund a pung ve zel a, tunah chuan cheng vaibelchhe 1.4 a tling thei tawh niin Dr Vanlalzarzova hian The Aizawl Post a hrilh.
“Revolving Fund atangin thawhchhuah a lo pung hret hret a. Production quality-ah hma kan sawn ve zel bawk a, kan production thenkhat chu phai lama siamchhuah aia tha zawkte pawh an ni a, mah se, ran chaw mamawhtuten phai atanga siam chhuah ran chaw man ranchaw dawrah an bat theih avangin Feed Plant hian demand a hmu tam thei loa, keini chuan a ba-in kan pe ve thei lo a, demand a tlem phah a, kan khawl tha chakna ang hi kan la chhawr pha lo,” a ti.
Feed Plant atanga ran chaw siam chhuah hi bawng chaw a tam ber a, zaa 50 vel niin, vawk chaw 30% leh ar chaw 20% vel siam chhuah a ni. Bawng chaw hi state pawn atanga lakluh aiin a tha zawk a, a man pawh a tlawm zawk niin thudawnna chuan a sawi a. Ran chaw siamna chawhpawlh zinga tam ber, vaimim (50-60%) chu state dang atangin 90% vel chawkluh thin a ni a; Feed Plant hian kuminah Mizoram chhung atangin vaimim lei tur a hmu lo niin thudawnna chuan a sawi bawk.
SEDP hnuaiah khan vaimim-ah contract farming kalpui niin, Agriculture department-in quintal 25,000 vel vaimim thar chhuak thei tur anga a insawi laiin, Feed Plant-in vaimim quintal 700 vel lak tur a hmu a, chu chu thlakhat tla a ni.
Mizoram mamawh ran chaw za zela 90 vel state pawn atanga chawkluh mek tihniam thei tur chuan state feed plant hian ran chaw tam zawk a siam chhuah theih a ngai a, chumi tur chuan ngaihtuahna sen mek a ni, thudawnna chuan a ti.
Animal Feed Plant Ramrikawna 2023 chhunga ranchaw siam chhuah
Ran chaw In quintals
Bawngchaw 4655
Vawkchaw 3420
Ar chaw 2550
TOTAL 10625
Kum 2023 chhunga vaimim lei dan
Phai 4744.26
Burma 1430.35
State chhung 63.77