Department tinah central scheme chawr tam dan daptu tur din ang – F Rodingliana

Department tinah central scheme
chawr tam dan daptu tur din ang
– F Rodingliana
Sawrkarin central scheme tam thei ang ber chhawr tangkai a duh a, chumi atan chuan department tinah a hman tam theih dan zirtu tur Expert Team din a ni dawn tih minister F Rodingliana chuan a sawi.
Minister F Rodingliana ho hian a department chan – Power & Electricity leh Commerce & Industries officer-te chuan Nilaini khan kumthar atana inhlantharna an hmang a. Kum 2025 chhunga department hmasawnna hnathawh hrang hrang avangin lawmthu a sawi a, kum tharah rilru tharin tuna an thlen chin atanga hma sawn zel turin a chah.
Department officer-te chu central scheme hrang hrang zirchiang a, Mizoram-in a chhawr tangkai theih tur dap kawngah nasa lehzuala tan la turin a chah a. Central ministry hrang hrang hawilam azir zela DPR leh project proposal siamin, ministry lama thang kam nasat a tul tih a sawi. Department tinah Central Scheme Study Team din a ni dawn, tiin, “Central scheme tam zawka chhawr tangkai a nih theihnan expert team hi din a tul a ni,” a ti.
P&E minister chuan, megawatt 24 thar chhuak thei Tuirini Hydel project chu kumin January chhungin a lungphum phum tum a ni a. Mw 5 tharchhuak thei Sumsuih Solar Plant chu hna zaa 20 chuang thawh a ni tawh a, power lama intodelh tura hmalakna tluang taka a kal avangin lawmawm a tih thu a sawi. Hydel project enkawl mek thenkhat thuamthat niin, Kau-Tlabung SHP tan cheng nuai 40, Teirei SHP atan nuai 60 leh Kawlbem SHP atan nuai 250 dah hmangin khawl thawmthat mek a ni tih a sawi.
P&E department corporation-a let tura hmalakna bawhzui mek zel a ni tih a sawi a. Department chu strategic business unit pathum – generation, transmission leh distribution ah then tura thutlukna siam a ni tawh a, siamrem ngai lai siamrem hnuah a taka hman thuai a ni dawn tih a sawi a ni.
Industries minister F Rodingliana hian, industry hmasawnna atan industrial area tangkai leh awmze nei zawka hman a nih theihnan internal road siam belh leh siamthat hna sum awm ang anga thawh chhoh mek a ni tih a sawi a. Industrial area hrang hrang GIS mapping leh re-plotting tih zawh tawh niin, industrial unit hrang hrang awmze nei zawkin dahkhawm tum a ni tih a sawi. Geology & Mining department hma lak that avangin cheng vaibelchhe 100 sawrkar laipui atangin dawn a ni tih a sawi bawk.