Samagra Shiksha, Kolasib District buatsaihin NIPUN Bharat Awareness Programme leh Distribution of Tablet chu nimin khan BRC Hall-ah hman a ni a, Deputy Speaker Lalfamkima, Kolasib bialtu MLA chuan khuallian niin a hmanpui.
Kolasib district chhunga Primary School leh Middle School 128 hnenah, school-in an activity report an pekna tur hmanrua atan Tablet sem chhuah a nih bakah, NIPUN Bharat hnuaia Mizoram pum huap Music Video siam intihsiaknaah Kolasib District-a Kawnpui Primary School 3 chuan pathumna lawmman a dawn hlanna hun hman a ni bawk. Heng lawmman leh thilpek te hi Kolasib Bialtu MLA, Deputy Speaker Pu Lalfamkima chuan a hlan a ni.
Deputy Speaker Lalfamkima chuan zirlaite leh zirtirtute tana Tablet sem chhuah a ni chu lawmawm a tih thu leh Sawrkar laipui hmalakna tha tak chu a tihlawhtlingtu ni zel turin zirtirtu te a fuih a, zirtirna kan kalpui dan a danglam tawha, khawvel changkang chho zel mila zirna kan kalpui thiam a pawimawh a ni a ti a, tun dinhmunah chuan Internet hmangin zirna kawngah kan duh ang information kan hmuh theih tawh avangin hman tangkai thiam a pawimawh a ni, a ti bawk.
Deputy Speaker-in Tablet semna hun hmanpui
