Derthawng tak chungin Argentina an chak

World Cup 2026 khelh mek chu Inrinni zing khan last 32 khelh zawh a ni a, Cape Verde lakah derthawng taka chak Argentina in last 16 an lut. Champion lai Argentina hian Australia hnehtu Egypt an hmachhawn zui leh dawn.
Inlen hleih, intiat si
Hard Rock Stadium-ah football-a Goliatha leh David te an inhmachhawn. Champion lai leh FIFA ranking a No. 1 ni mek Argentina chuan Fifa ranking a No 67-na leh World Cup a hmel thar Cape Verde an hmachhawn. Ranking leh hlawhtlinna hrang hrang an chan tawhah inlen hleih viau mah se khelmualah an intiat tawk viau thung a, hun pangngaiah chak zawk an awm thei lo hial. Hei hian Football-ah chak zawk sawi lawk theih a nih lohzia a lantir.
World Cup 2026-ah beisei phak baka khel tha a, last 32 inhlangkai ta hial Capo Verde lakah team lian leh rinkai zawk Argentina in bul an tan tha a, an game a nghet thawkhat. Game an thunun a, an khingpuite an nawr bet. Beisei angin goal thun thuai lo mah se Argentina in darkar chanve hmain hmahruaina goal an thun hman. Defender Lisandro Martinez ball pek fing leh fuh (Killer pass) dawngtu Lionel Messi chuan chep tak kar atangin minute 29-naah a pet goal a, hmahruaina goal a thun.
World Cup 2026-a bul tan tha a, beisei phak baka chetha Messi hian khelh li atangin goal 7 a thun a, Golden Boot dawn tumin hma lam a pan zel. Messi hi World Cup-ah goal 20 a thun tling chiah a, World Cup-a goal thun hnem ber a ni mek. World Cup-a goal thun hnem ber a nih bakah World Cup-ah a zawna khelh riat chhung goal thun zawn thei hmasa ber leh awmchhun a ni bawk.
Goal thun hmasa zawkah tan mah se Argetina khelh danah dik lo a awm a, an che a pelh deuh tlat zel. Ghana dawithiamin an chak loh thu a sawi vangin Argentina tantute leh an player te ngei pawhin hlauhthawnna an nei emaw tih tur a ni a. An tawng pachhiat ta mai emaw tih theih turin an game-ah dik tawk lo awmin, inrintawkna an hloh.
Cape Verde in hnufual zawk ni chungin chawlhlawk hmang mah se chawlhlawk hnu lamah goal an thun thuai. Fuh taka an khingpuite an nawr tlang hnuin Deroy Duarte chuan minute 59-naah fuh zetin a pet goal a, an si phurh a sut. 1-1 a nih hnuin inkhel a hmuhnawm zui viau a, goal thun tumin an innawr tawn nasa hle. Argentina in hun tha nei fo mah se si nghak che tha bon tak Vozinha chuan pui zet zetin a dang zel a, an team a chhanhim. Vozinha a chet pui theih em vangin hun pangngaiah Argentina in goal an thun belh thei lova, extratime khelh a ngai.
Extra-time-ah Argentina an che fuh hmasa a, khel tha tak Lisandro Martinez chuan minute 92-naah pui zeta pet goal in hma an hruai nawn lehna goal a thun. Hma hruai nawn leh mah se Argentina an buai leh nghal tlat a, an khingpui ten nawr buaiin an si phurh an sut leh thuai. Capo Verde tan hian Sidny Lopes Cabral chuan minute 103-naah goal ropui thunin an si phurh a sut. Cabral goal thun hi World Cup 2026-a goal mawi leh ropui ber ni hiala ngaih a ni.
An inhnehtawk thar leh hnuin Argentina an hlauthawng thar leh a, last 16 lut zo lova tla in, an mualpho mai a rinawm hman viau. An boruak hniam viau mah se Lionel Messi corner chhuih tha tak chu defender Christian Romero chuan minute 111-naah a tuah goal a, hma an hruai nawn lehna goal a thun. Romero tauh luh tha tak hi Diney Borges banin a lo deh kawi zeuh vangin own-goal a chhiar a ni ta thung.
Hma an hruai nawn leh chungin Argentina an talbuai zui leh zat. Capo Verde in goal thun ngei tumin tan an khawh a, an khingpuite an nawr hle. Argentina tlarhnung talbuaiin Cape Verde in an si phurh sut teuhh viau thin mah se derthawng tak chungin Argentina an chak ta hram a, Cape Verde lakah 3-2 a hnehna changin last 16 an inhlangkai a. Last 16 ah Australia hnehtu Egypt an hmachhawn zui leh dawn. Cape Verde aiin Egypt hi an awl zawk a rinawm hial.
Argentina leh Capo Verde te inkhela goal pali, Messi, Martinez, Deroy Duarte leh Sidny Lopes Cabral te goal thun kha goal satliah lo, goal tha tak vek a ni a. Cabral goal thun phei kha chu World Cup 2026-a goal ropui leh mawi ber a ni hial ang.
Champion lai Argentina hneh lovin tla mah se Capo Verde an khel tha tak zet a, chhuanawm takin an tla. World Cup an khelh vawi khatnaa an hnuhma hi Football khawvelin a hre reng tawh ang a. An ram mite zah leh ngaihsan an hlawh hle ngei ang.
Cape Verde hian World Cup an khelh hmasak berah World Champion thiau pathum; Spain, Uruguay leh Argentina te an hmachhawn a. Team lian pathumte hi hun pangngaiah an inhnehtawkpui vek. Argentina khelh danin beisei a phak lova, an khel tha tawk lova ngaih ni bawk mah se Spain pawhin Cape Verde hi an hneh zo bik chuang lo. Hei hian Cape Verve that tawkzia chiang takin a lantir.
Egypt an chak hram
Zinrtawp zana last 32 inkhel dangah Egypt chuan harsa takin Australia an hneh a, last 16 an inhlangkai.
Mohamed Salah hova inlan a, rinkai zawk Egypt hian Australia lakah bul an tan tha a, Emam Ashour chuan minute 13-na lekah goal a thun nghal. Hma takah goal an chhuah vangin tlarhnung ven ngai pawimawh Australia in goal thun tuma an khingpuite an nawr a ngai a, game inhawng zawk hmuh tur a awm phah.
Australia hian minute 55-naa Mohamed Hany goal vangin an si phurh an sut a. Hun pangngai leh extratime-ah an inhnehtawk hnuin tie-break-ah 4-2 in Egypt an chak zui ta a ni.