DGP tharin MJA kawm
Mizoram director general of police thar Anil Shukla chuan Thawhtanni khan an president C Lalrambuatsaiha kal Mizoram Journalists’ Association aiawhte a kawm a. Thawhhona tha neihpuiah a sawm.
DGP thar chuan Indian Police Service a nihna anga state hrang hranga hna hrang hrang a thawh tawhnaah media mite nen inpawh taka an lo thawh ho tawh thin dan a sawi a. Mizoramah pawh journalist-te nen tha taka thawh ho a duh tih a sawi a ni.
He hna a chelh hnu hian Manipur buaina avangin khaw dang an la hawi hman loa, ngaihtuahna dang an la seng hman meuh lo nia sawiin, vawiina NGO Coordination Committee kawng zawh huaihawt tur pawh muanawm taka kalpui a nih ngei a beisei a, police-ten tih tur an neih ang erawh tha taka hlenchhuah tumin an inbuatsaih tih a sawi.
Tuna a hriat theih chinah Mizorama Meitei awm, haw duhte chu anmahni duhthua haw an ni a, engmah buaina awm loin a haw duh chu venhimna hnuaiah an haw mai tih sawiin, Manipur Police hotute nen an inbe pawp reng tih a sawi.
Zawhna chhangin, Mizoram kaltlanga dan loa sumdawnna thil kal thin chu police-ten theihtawp chhuahin an umzui reng a, ruihhlo pawh thahnem tak man a nih tawh thu te, an theih ang tawka dan loa sumdawnna hmetmit tura hma an lak zel tur thu a sawi a ni.
DGP tharin MJA kawm
