Dhaka-in Hasina-i thawn haw tura a ngenna India-in zir chiang mek

Dhaka-in Hasina-i thawn haw tura a ngenna India-in zir chiang mek
India chuan Dhaka-in an prime minister hlui, Sheikh Hasina-i thawn haw tura an ngenna chu an ngaihtuah a, an zir chiang mek tih a sawi.
Hasina-i hi nikuma zirlaite kaihhruaia a sorkar duh lohna lantir hun laia a mihringpuite laka a chet dan avanga thiam loh chantir, November 17-a thi tura Bangladeshi court-in a hrem a ni.
“Ngenna kan dawng a, court rorelna leh dan thilah zir chian mek a ni,” tiin Indian external affairs ministry thupuangtu, Randhir Jaiswal-a’n Nilaini tlaia kar tin thuthar lakhawmtute a kawmnaah a sawi.
Dhaka hian New Delhi hnenah Hasina-i hi mi tang inthawn hawsak tura inremna an neih angin Bangladesh-a hawtir turin an phut a. An rama rorel lailawk mekten tual chhunga indonaa pawi khawihna thleng thubuai ngaihtuah tura a din, International Crimes Tribunal (ICT) chuan thi tura hremna a pek bakah thubuai dangah a kaihhruai, Awami League party-in mite fuihpawrh zawnga an chet avang leh dan leh thupek kengkawhtu leh sipaiten civil mi an tihnat tur an dah theih loh avangin dam chhung tang turin a ti bawk.
“Bangladesh leh a mi chengte tana tha ber tur kan ngaihtuah a, muanawm, mipui rorelna kalhmang leh ram ngialnghet tha an nih theih kan duh a. Hemi chungchangah pawh hian kil hrang hranga tel ve theite nen sawihova inrawn zel a ni,” tiin Jaiswal-a hian thuthar lakhawmtute zawhna a chhang.
Bangladesh-a prime minister ni rei ber, Hasina-i hi mipuiin a laka lungawi lohna nasa taka an lantir hnuah bangin August, 2024 khan India-ah a tlan chhe zui a ni.
Thi tura tih a nih chungchangah a reltu tribunal chu tihchingpen leh thlan chhuah ni lo sorkar din mai a nih thu a sawi a, Awami League chu politic-a an hmelma a nih avanga hetianga thu titlu niin a sawi a. Bangladesh Chief Adviser Muhammad Yunus-a erawh chuan tute mah, thuneihna sang ber nei pawh dan chunga leng an awm lo niin a sawi ve thung.
November 17-a a chung thu remna a chhuah hnu lawkah Bangladeshi foreign ministry chuan Hasina-i leh home minister hlui, thi tura tih ve tho, Asaduzzaman Khan Kamal te chu inremna an neih anga an hnena hlan turin India hi a ngen nghal.
Hasina-i bakah hian Kamal-a leh police chief thin, Chowdhury Abdullah Al-Mamun-a te chu nikuma lungawi loh lantirna kaihhnawihah an chung thu rel a ni a. Kamal-a hi Hasina-i sorkar a tluk ruala tlanchhe ve nghalin Kolkata-ah a awm nia hriat a ni.
Hasina-i thu remna a chhuah hnu ni hnihah Indian National Security Adviser (NSA) Ajit Doval chuan Bangladeshi NSA Khalilur Rahman chu Delhi-ah kawng hrang hranga ram pahnih inkar sawiin a kawm a. He inkawmna hi Colombo Security Conclave (CSC)-a India, Maldives, Mauritius, Sri Lanka leh Bangladesh NSA theuhte intawh khawmnaah a ni.