‘Dhurandhar: The Revenge’ chuan Thawhlehni kalta thleng khan cinema hall ticket hralhna atangin khawvel huapin cheng vaibelchhe 900 chuang a la lut hman tawh a, Indian franchise zinga sum la lut tam pathumna a ni pha dêr tawh. He film hi Ningani kalta a tlangzarh kha niin, Nilaini a ral meuh chuan cheng vaibelchhe 1,000 la lut hman turin an chhut a, an tlangzarh atanga kar khat chhungin vaibelchhe 1,000 hi la lut thei turin an chhut a ni.
Sacnilk-in a tarlan danin Dhurandhar: The Revenge hian Thlawhlehni thleng khan khawvel huapin cinema hall ticket hralhna atangin cheng vaibelchhe 919 a la lut thei a, India bika a lak luh chu cheng vaibelchhe 687.43 a tling.
Dhurandhar film hmansa, nikum December-a an tlangzarh khan cinema hall ticket hralhna atangin cheng vaibelchhe 1,300 a la lut thei a, tunah a film chhunzawmnain vaibelchhe 919 a la lut leh tawh bawk a, a belhkhawmin vaibelchhe 2,219 a la lut tling tawh a, Indian franchise-ah chuan sum lak luh tama pathumna a ni ta.
‘Dhurandhar’ hian ‘Pushpa’ film pahnih sum lak luh a rawn lehpel a, pathumna dinhmunah a rawn ding a, Pushpa film pahnihin cheng vaibelchhe 2,002 a la lut thei a. Tunah chuan ‘Baahubali franchise pawh lehpel thei turin an chhut a, ‘Baahubali: The Beginning’ (2015) leh ‘Baahubali 2: The Conclusion’ (2017) bakah a kum 10 tlin champha a an tichhuah ‘Baaubali: The Epic’ te khan belhkhawmin cheng vaibelchhe 2,462 an la lut thei a, hei hi Dhurandhar hian a lehpel thei ngei dawn niin an chhut bawk.
Indian franchise zinga sum la lut tam ber chu YRF spy universe niin, film paruk awm tawhin, an sum lak luh belhkhawm chu vaibelchhe 3,195 a tling a, heng film paruk zingah hian Salman Khan ‘Tiger’, Hrithik Roshan ‘War’ leh Shah Rukh Khan ‘Pathaan’ te pawh a tel.
‘Dhurandhar 2’-in vbc 1,000 hnai tawh
