Diabetes warning signs
Zunthlum (diabetes) hi ‘silent killer’ ti te pawhin an sawi thin, a chhan pawh a sign hrang hrang te hi ngaihhai palh a awl vang a ni a, mahse, kan hriat loh laiin kan taksa peng hrang hrang te a lo tichhe hman viau thei bawk si. Diabetes-ah chuan blood glucose sang chu tûr ang maia hnathawkin, BP sangin a zui duh hle a, blood lipids te pawh a normal lo thin a, chu chuan kan taksa a tichhe ta thin a ni.
Kan taksaa cell te hian chakna (energy) atan glucose an mamawh a, kan taksain tha taka hna a thawh theih nan glucose chu kan mamawh bawk si. Glucose hi direct-a kan ei leh in atanga kan lakluh a awm, mahse, a tam zawk chu kan kawchhungah a bikin ril-ah kan ei leh in a carbohydrate leh starch kehdarh atangin a lo insiam a, entir nan kan buh ei te, chhang, alu leh thildang kan eia starch te chu an kehdarh hnuah glucose-ah a lo chang leh thin. Glucose chu kan thisen zamin kan taksa hmun hrang hranga cell-ah a sem darh leh ta a ni.
Mahse, kan taksain glucose hmang tangkai thei tur chuan insulin a mamawh leh a. Insulin chu hormone kan ril (pancreas) a insiam a ni. Insulin chu tala hawn nana chabi ang deuh niin, kan cell-a glucose a luh theih nana kawngka hawngtu chabi a ni. Miin type 1 diabetes a neih chuan a taksaah insulin a insiam chhuak tawh lo va, chuvangin a taksain glucose a hmang thei tawh lo a, chuvangin regular taka insulin injection a lak a ngai ta thin a ni. Miin type 2 diabetes a neih chuan an taksaah insulin insiam mah se an hmang tha thei lo (an cell kawngka chu a kalhna tala a chhia ang deuhin chabi- insulin chuan a hawng thei lo) a, tichuan insulin resistant tih an lo ni ta thin.
Type 1 leh Type 2 diabetes hi a sign leh symptoms inang deuh deuh pawh a awm nual a, tun tumah hian Times of India health section-in diabetes warning sign ni a an sawi te kan rawn tarlang e.
A chang chuan diabetes hi a warning sign engmah lang chhuak lo pawhin a lo awm thut thei a, diabetes hmun thuma thena hmun khat chuan diabetes an nei tih an inhre lo a, chung zinga a tam zawk chu Type 2 diabetes an ni. Hei vang hian diabetes risk i nei sang deuh ni a i inhriat chuan warning sign engmah awm lo mah se doctor hnenah test a tul leh tul loh te zawh thin tur a ni.
Diabetes warning sign common deuh zingah chuan tui hal deuh huam huam anga awm fo leh ka chhung ro te, nidang aia zun chhuak ngun leh zun tam te, ril tam deuh fo te, a chhan hriat si loh a rihna tlahniam te, i ei leh in a ngai reng emaw, i ei tam zawk emaw a nih pawhin i rihna a tlakhniam te, hnathawh hah vang pawh ni si lo a chau leh zawi deuh ngawih ngawih a awm te, serh bawr vela infection neih deuh fo leh intih pem palh a dam hleithei lo neih leh khawhmuh fiah lo, thil hmuh phe deuh te an ni.
Diabetes hian kan hriselna kawngah a tha lo zawnga nghawng pawi tak a neih theih avangin a sign hrang hrang te hi kan hriat bel hle a pawimawh. Heng a chunga diabetes warning sign zinga a eng emaw ber hi i nei a nih chuan doctor rawn ang che. Diabetes hi ei leh in lama fimkhur a, exercise lak that a, damdawi te ei that chuan control theih a ni.
Diabetes warning signs
